Tàm dơ̆ tus lơh broă tàm càr Sơn La ngai 08 nhai 01 nam 2014, Tổng Ƀí thư ồng Nguyễn Phú Trọng bal mờ mpồl kwang bàng lơh broă neh tus còp mờ lơh broă tàm Hìu măi lơh đèng dà Sơn La. Gơwèt mờ kwang bàng, cau lơh phan- ală cau pơnyờ să geh wă rò Tổng Ƀí thư hơ̆ là ală jơnau kah wơl ờ tŭ lơi huĭ. Nùs nhơm niam, ờ pơnhừ să mờ ală jơnau nting bơto nền nòn bơh Tổng Ƀí thư dê sùm geh tơl nă cau kah sùm mờ bơsram.

Tổng Ƀí thư kơ̆p kờñ mpồl kwang bàng, kỹ sư, cau jăk, cau lơh phan, cau lơh broă tàm Kông ty pơn jăt tai đờm jăt broă lơh mờng chài, cồng nha neh lơh geh tàm broă bơ̆t bơtàu, lơh broă lơh, pơn jăt tai ai tơngŏ  nùs nhơm pin dờn, gơnoar broă kwơ màng bơh hìu măi pờ tơlik ồs đèng dà Sơn La dê; dong kờl lơh, lơh broă niam, lơh geh cồng nha ală broă lơh hìu măi pờ tơlik ồs đèng dà ndai dà lơgar dê.

Klo yal Tổng Ƀí thư ồng Nguyễn Phú Trọng sang rài, kwang bàng mờ làng bol càr Quảng Ngãi ai lơh pơlai soh uă ngan. Tổng Ƀí thư ồng Nguyễn Phú Trọng là krơh àng, krơh niam ngan bè nùs nhơm kac màng; jơh dùl rài kis tă pơgồp ai Đảng, Dà lơgar mờ làng bol in. Tàm jơnau kah kir bơh kwang bàng mờ làng bol Quảng Ngãi dê, Tổng Ƀí thư ồng Nguyễn Phú Trọng là kwang đơng lam bồ kâp dờng mơya rềp mềr, pơn dềt să mờ niam ngan. Ồng Phạm Đình Khối, lài do là Ƀí thư Tỉñ ủy càr Quảng Ngãi pà git: Geh tìp mat Tổng Ƀí thư ồng Nguyễn Phú Trọng uă dơ̆ mơya dơ̆ gơ lời wơl jơnau kah kir ngan rlau jơh là tŭ wa Trọng rê Quảng Ngãi tus bal Dơ̆ sơn đờm ai ngui Tiah kah kơlôi Thủ tướng ƀồc ồng Phạm Văn Đồng. Ngai 31/8/2008, Tổng Ƀí thư ồng Nguyễn Phú Trọng neh rơ wah đì rơndeh ồs bơh Hà Nội mut Quảng Ngãi.

Wă rò Tổng Ƀí thư tàm anih rơndeh ồs ơm Quảng Ngãi, ồng Phạm Đình Khối mờ uă ngan cau ờ gơtùi pồn bơta ngoh rơngac: “Dùl nă kwang đơng lam bồ kâp dờng bè hơ̆ mờ đì rơndeh ồs bơh Hà Nội mut Quảng Ngãi. Tŭ jàu guàng bơkàu ai Tổng Ƀí thư in, kup tê, kuar Tổng Ƀí thư añ gŏ ờ gam geh bơta yah ngài đah kwang đơng lam bồ tai mờ là nùs nhơm bơh cau lơh broă bal đềt mềr dê. Rê mìng 3 ngai lơm mơya wa lòt sùm. Tơnơ̆ hơ̆ lòt Tây Trà, mò còp xã, tìp mat làng bol nàng lùp còp, jàu pà phan dềt rơhền lơm, mơya gơ wèt mờ Tổng Ƀí thư hơ̆ là nùs nhơm dờng ngan rlau jơh.”

Bal mờ gùt lơgar, làng bol kis tàm kơnhoàl Mỹ Xuyên, càr Sóc Trăng moăt jrùng ngan tŭ kơno jơnau yal Tồng Ƀí thư ồng Nguyễn Phú Trọng sang rài. Lơh jơnau moăt gơs broă lơh kăc màng, Đảng ƀộ, gơnoar atbồ bal mờ làng bol kis tàm kơnhoàl Mỹ Xuyên pơn jăt tai tam klăc bal, ñhăp ñhar, bơceh lơh, lơh ngan ai jơh bơta pràn bơ̆t bơtàu Đảng, bơ̆t bơtàu mpồl cíñ trị kloh niam, pràn kơl dang, bơ̆t bơtàu ƀòn lơgar ngai sơlơ pas gơs, gơboh gơbài bè jơnau Tổng Ƀí thư kơ̆p kờñ sùm.

Ồng Lương Minh Quyết, Củ tịc Anih duh broă làng bol kơnhoàl Mỹ Xuyên yal wơl, pơgăp mờ do mờr 10 nam, Tổng Ƀí thư ồng Nguyễn Phú Trọng tus còp mờ lơh broă tàm xã Ngọc Tố (01 tàm 03 xã ƀòn lơgar pa sơnrờp ngan càr Sóc Trăng dê), tŭ geh tìp mờ Tổng Ƀí thư neh lời wơl tàm nùs nhơm ồng rùp rài bơh dùl nă Tổng Ƀí thư ờ pơnhừ să, niam nùs, kơ̆ dơn mờ ngăc ngar. Ồng Lương Minh Quyết yal: “Tŭ do Wa neh roh, lời wơl tàm nùs nhơm añ kung bè ală cau dùl bơta moăt jrùng ngan. Tàm bơta moăt do, añ kơ̆p kờñ he pal lơh jơnau moăt gơs broă lơh kăc màng; tơl nă kwang bàng, đảng viên mờ làng bol lơh ngan bơsram jăt ơnà jăk bơh wa Tổng Ƀí thư Nguyễn Phú Trọng dê nàng pơgồp bal tàm broă bơ̆t bơtàu ƀòn lơgar he, dà lơgar he ngai sơlơ pas gơs, gơguh jăk mờ pràn kơl dang”.