Đảng viên Lò Văn Phương nam do neh 60 sơnam, ồng geh gĭt tus ờ mìng là cau geh bơngă pin dờn tàm ƀòn lơm mờ gam là krơh niam lam lài tàm broă lơh bơtàu tơnguh lơh sa, brồ guh tơn jơh jơgloh tơrmù rƀah. Nam 2016, hìu bơnhă ồng Phương bal mờ 60 hìu bơnhă làng bol tàm ƀòn Huổi Lẹ dê geh dong kờl pà kơn rồ me sơntìl, be me sơntìl mờ tờm chi sa plai jat rơndap broă lơh bơtàu tơnguh lơh sa- mpồl bơtiàn ală jơi bơtiàn kòn cau dùl ết nă cau ngan, tơngai bơh nam 2016 tus nam 2025 bơh Cíñ Phủ dê, ồng neh cih mat tus bal ală ơdŭ bơto pơlam, tàm jàu bơta chài ngui măy mok pa, sơng ka sền gàr phan tam phan ròng mờ geh lòt sền, bơsram bơta mờng chài nàng mŭt ngui tàm broă lơh sa den tàng neh cèng wơl cồng nha lơh sa uă. Tŭ do, hìu bơnhă ồng Phương dê geh rlau 1 lồ tờm pơ ò, mpồl phan ròng mờr 20 nơm rơpu, kơn rồ mờ 30 nơm be cèng wơl priă jền ai hìu bơnhă ồng in rlau 150 tơlak đong pah nam, ồng kung là dùl nă kòn cau La Ha pơn rơ jak ngan bơh càr Sơn La dê chờ hờp ngan geh dờp bằng khen bơh Thủ tướng Cíñ phủ dê bè cồng nha jak ngan tàm broă bơt bơtàu mpồl tam klăc dờng jơi bơtiàn kòn cau mờ bơtàu tơnguh lơh sa- mpồl bơtiàn tiah làng bol kòn cau dùl ết nă cau.

Ồng Phương pà gĭt: Lài do rài kis làng bol kòn cau La Ha bol añ kal ke ngan, lơh sa uă ngan là lơh is sa is, gơ lơh bè hìu lơi kung là hìu bơnhă rƀah lơm. Kơnờm Đảng, Dà lơgar sền gròi dong kờl pà phan tam, phan ròng, bơto pơlam làng bol broă lơh sa, bơtàu tơnguh lơh sa den tŭ do rài kis hìu bơnhă añ kung bè làng bol tàm ƀòn Huổi Lẹ neh tam gơl bè uă gah, hìu lơi kung geh rơndeh măy, tivi, oh kòn geh lòt bơsram tơl làm, làng bol La Ha bol añ sùm tam klăc bal lơh jat di mờ gùng dà broă lơh bơh Đảng dê, pơn đơl pràn lơh ngan lơh sa, bơt bơtàu rài kis, ƀòn lơgar Nậm Giôn ngai sơlơ hờm ram mờ bơtàu tơnguh.

Kơnhoàl Mường La geh 822 hìu bơnhă làng bol kòn cau La Ha ơm kis tàm 18 ƀòn bơh 10 xã, uă ngan là ală tiah ngài mờ anih tờm kơnhoàl dê, khà hìu bơnhă rƀah gam uă, bơta niam khà kờp làng bol, bơta niam rài kis gam tàm khà lơyah. Bơh nam 2019 tus tŭ do, kơnhoàl neh ai khà priă tă rlau 18 tơmàn đong nàng dong kờl làng bol ală ƀòn in blơi măy mok, dong kờl pà 122 nơm be me, 654 nơm kơnrồ me ai 776 hìu bơnhă làng bol kòn cau La Ha in, lơh geh broă lơh sa dong kờl làng bol bơtàu tơnguh lơh sa bè ờs wơl rài kis. Mơkung pờ 3 ơdŭ pơlam tàp, bơto bơtê bơta gĭt wă ai 209 nă kwang bàng kòn cau in, pơgồp bơnah lơh jat geh cồng nha broă lơh hòi jà làng bol tàm ƀòn lơgar.

Ồng Nguyễn Trọng Hiệp, Kwang atbồ Cơlŭ lơh broă Jơi bơtiàn kòn cau kơnhoàl Mường La pà gĭt: Gơwèt mờ làng bol ală jơi bơtiàn kòn cau tàm ù tiah kơnhoàl Mường La den Ủy ƀan Ñân zân càr Sơn La neh ai lơh jat kơrnoat sồ 2407 ring bal Rơndap broă lơh dong kờl mờ bơtàu tơnguh lơh sa- mpồl bơtiàn bơh làng bol kòn cau La Ha dê. Do là broă lơh krơi is mờ dong kờl ai làng bol kòn cau La Ha in nàng kờñ bơtàu tơnguh tơl làm mờ tơnguh uă gơnoar broă bơh jơi bơtiàn dê, tơn jơh jơgloh tơrmù rƀah lơh niam wơl mờ tơnguh niam rài kis phan bơna, tơn jơh jơgloh tơrmù rƀah dùl bă kơ̆ kơljap.

Bơh ală gùng dà broă lơh dong kờl tơl làm, bơcri priă lơh dùl ròt bal bơh Đảng mờ Dà lơgar dê, rài kis làng bol kòn cau La Ha tàm kơnhoàl Mường La gam geh ală bơta tam gơl uă ngan, rùp rài ƀòn lơgar pa gam hời rơ hời mpờl gŏ tàm ală ƀòn lơgar tiah kơh bơnơm dê, làng bol neh hời rơ hời tam gơl bơta kơlôi sơnơng bè broă lơh sa, bơtàu tơnguh lơh sa, mpồl bơtiàn tam klăc bal sền gàr mờ lơh jat niam ală bơta kwơ niam chài ờs mờng, dùl nùs pin dờn kơ̆ kơl jap jat Đảng, sơm bat tê bal mờ kấp ủy, gơnoar atbồ lơh pas ai ƀòn lơgar in.