Thôn R’Chai 3, xã Phú Hội, kơnhoàl Đức Trọng, càr Lâm Đồng geh 305 hìu bơnhă, geh 5 jơi bơtiàn kòn cau oh mi ơm kis bal, hơ̆ là: Yoan, K’Ho, Khmer, Tày, Nùng, tàm hơ̆ cau K’Ho geh uă ngan rlau jơh. Tàm ù tiah thôn geh jăt 4 Yàng, là: Yàng Tin lành, Yàng Phờk, Yàng Cao Đài mờ Yàng Bàp.

Làng bol ală kòn cau tàm thôn sùm gĭt kong bòl glar kal ke, tam klăc tàm dong kờl bal mờ gơ̆p tàm rài kis. Tơnơ̆ tŭ kòp Kovid-19 geh gròi sền jơh, làng bol ală kòn cau, ală gah jăt Yàng tàm do neh jơh nùs bơtàu tơnguh lơh sa, pơgồp bơnah bơ̆t bơtàu ƀòn lơgar ngai sơlơ bơtàu tơnguh tơl ală bơta. Nam 2022, priă lơh geh kờp bal dùl nă cau geh 58 tơlak đong. Jơh dùl thôn mìng gam 2 hìu rƀah lơm. Ồng Ka Să Ha Nhiếu, Kwang geh jơng tàm Ủy ƀan Mặt trận dà lơgar Việt Nam càr Lâm Đồng, là dùl nă cau geh bơngă pin dờn tàm thôn R’Chai 3, xã Phú Hội, kơnhoàl Đức Trọng, càr Lâm Đồng chờ hờp yal: Añ chờ hờp ngai tài bơh ngai do, làng bol tàm thôn neh gĭt bơsram jăt oh mi cau Yoan, gĭt tam gơl bồ tơngoh kơlôi sơnơng tàm broă tam phan, tam gơl broă lơh sa sươn sre. Làng bol tàm do neh gĭt ală bơta chi tam lơh geh priă jền uă, bè: mrĕ, laghim, blơn sŭt, biăp, plai su su, kơphê...Tàm thôn tŭ do geh tus pơgăp bơh 30 tus 40% hìu làng bol tam laghim, añ gŏ geh bơta tam gơl loh làng ngan tàm broă lơh sa.

Dà Sar là xã tiah sar lơgar ngài bơh kơnhoàl Lạc Dương, càr Lâm Đồng dê, là dùl tàm ală xã tiah jơi bơtiàn kòn cau dùl êt nă cau gờñ ngan lơh geh jơh ală broă jàu bơ̆t bơtàu ƀòn lơgar pa. Jơh gùt xã  geh 7 rbô 832 hìu làng bol, bal mờ rlau 31 rô 200 nă làng bol; tàm hơ̆ làng bol kòn cau geh tus mờ 70% khà kờp làng bol. Tàm ală nam pa do, kơnờm khin cha tam gơl bơh kơphê neh kra jŏ sơnam ờ huan geh uă plai nàng ai wơl ù tam tờm zơu, ròng tu, mờ tam ală tờm biăp, bơkàu, plai đo ndai, làng bol neh lơh geh priă jền uă. Ồng Cil Ha Ổn ơm tàm thôn 3, xã Dà Sar, kơnhoàl Lạc Dương, càr Lâm Đồng pà gĭt: Uă ngan làng bol tàm do là dòn Yàng Tin lành, mờ geh gơnoar ătbồ tàm tiah do ai tơl bơta lơh 2 nơm Hìu Jum niam ngan. Kơnờm bơh lơh sa bơtàu tơnguh, làng bol kòn cau là kòn sau Yàng Tin lành tàm do neh geh phan nàng wă rò sa chờ hờp Noel ram mhŭ mờ lơngăp lơngai. Ồng Cil Ha Ổn, chờ hờp đơs: Nam do, añ ưn ngài ngan gơnoar ătbồ neh sền gròi kơryan kòp Kovid-19 neh rlau nđờ nhai do rao, den tàng dơ̆ pơrjum sa Noel do halà ñô bau ndrờm geh lơh niam lơm chờ hờp lơm. Kờñ Noel sơlơ chờ hờp mờ duh hồl rlau tai, bol añ jà mpồl dròng cing tus bal dròng cing nàng gơ in chờ hờp.

Mò Liêng Jrang K’Sáu, Củ tịc Mpồl Cau lơh broă sa xã Dà Sar, kơnhoàl Lạc Dương pà gĭt: Tàm ală tŭ bơ̆t bơtàu ƀòn lơgar pa, bal mờ gơnoar broă bơh ală mpồl cau dê, ală cau duh broă Yàng tàm do neh hòi jà làng bol kòn sau Yàng jơh nùs tus bal. Uă hìu bơnhă neh pà ù lơh gùng, jơh nùs tus bal tă pơgồp ngai lơh broă. Kơnờm bè hơ̆ den tàng muh mat ƀòn lơgar neh tam gơl uă ngan. Mò Liêng Jrang K’Sáu, Củ tịc Mpồl Cau lơh broă sa xã Dà Sar, đơs nền: Jơh ală làng bol kòn sau Yàng tàm do ờ mìng lơh jăt niam gùng dà broă lơh bơh Đảng mờ Dà lơgar dê mờ gam ơm kis lơh lòt di mờ jơnau đơs “kis niam tàm rài kis lơh àng sơrdah jơnau Yàng”. Mò Liêng Jrang K’Sáu, đơs: Ală cau duh broă Yàng khi sùm lam bồ, lơh krơh tàm broă lơh jăt gùng dà broă lơh bơh Đảng, adat boh lam Dà lơgar dê, jơh nùs tus bal tàm ală dơ̆ hòi jà, tus bal ală dơ̆ pơrjum bơh gơnoar ătbồ tiah do dê bơyai lơh nàng hòi jà làng bol kòn sau Yàng lơh jăt niam.

Mìng gam dùl poh tai là mŭt tàm nam pa 2023, dùl kàl Noel rê wơl tai. Tàm ală ngai do, kwang đơng lam bồ càr Lâm Đồng mờ ală tiah tàm càr neh lòt còp, gờm chờ tơngkah ngai Kơnràñ Lik lìng tàm ală Hìu Jum, Hìu Yàng mờ jờng rơ ngan ală tă pơgồp bơh ală cau duh broă Yàng, cau drơng gàr mờ làng bol kòn sau Yàng tàm ală broă lơh sa- mpồl bơtiàn, bơtàu tơnguh wơl lơh sa, bơtàu tơnguh rài kis. Kwang đơng lam bồ càr Lâm Đồng đơs nền gơnoar ătbồ ală kâp sùm dong kờl ai tơl bơta niam ngan rlau jơh nàng ală gah jăt Yàng in pơrjum niam; lơh geh jơnau kờñ pơrjum pin dờn duh khuai bơh ală làng bol kòn sau Yàng dê. Mờ kơ̆p kờñ ală bàp Yàng, ală Mục sư, ală cau duh broă Yàng, cau drơng gàr broă Yàng pơn jăt tai lơh jăt niam nùs nhơm duh rơngòt Yàng, kờñ gơboh Dà lơgar, hòi jà làng bol kòn sau Yàng lơh broă lơh sa, bơtàu tơnguh rài kis, mờ jơh nùs tus bal bơ̆t bơtàu mpồl tam klăc dờng jơh gùt jơi bơtiàn.