Xã tiah nhàr lơgar Ia Nan, kơnhoàl Đức Cơ, càr Gia Lai geh rlau 8 rbô nă làng bol, uă ngan là cau jơi bơtiàn dùl êt nă cau ơm kis. Mờ ù tiah xã dờng ơning ơnàng ngan, làng bol ơm kis rơha, uă làng bol kung gam sùm mòn is phàu nàng ting cuh phan brê. Trung tá ồng Đỗ Giang Nam, Kwang ătbồ Kwang àng xã Ia Nan, kơnhoàl Đức Cơ, pà gĭt: Ù tiah xã Ia Nan geh 3 ƀòn làng bol jơi bơtiàn dùl êt nă cau, uă ngan làng bol lơh sa tàm sươn mìr. Geh jơnau yal bàr pe nă làng bol prăp pồn phan tam lơh, siau phàu bơrtoh tàm sươn mìr ờ cèng rê tàm tiah ơm kis, hìu ơm. Mpồl kwang àng xã să tờm tơn pơgồp bal mờ mpồl cau ling sền gàr tiah nhàr lơgar, mpồl ling klàng tàm tiah do mblàng yal, hòi jà ơruh pơnu tàm ală thôn, ƀòn sùm ngui phàu mòn is nàng ting cuh phan brê ờ gŏ di ngui tai.

Ală kwang bàng kwang àng kung pơgồp bal mờ kra ƀòn, cau geh bơngă pin dờn nàng hòi jà ală cau gam ngui phàu mòn is, siau phàu bơrtoh lòt jàu wơl ai mpồl lơh broă geh gơnoar in. Pơnrơ là ồng Rơ Châm Míu, cau geh bơngă pin dờn tàm ƀòn Nú, xã Ia Nan sùm pơgồp bal tàm ală dơ̆ pơrjum cribơyai nàng bơto sồr làng bol lơh jăt niam adat boh lam, kis tam klăc bal, sùm kờñ gơboh, tàm dong tàm kờl bal mờ gơ̆p tam broă lơh sa, ờ gŏ di prăp pồn phan tam lơh mòn lơh is. Rơ Châm Míu, đơs: Ngui phàu den pa do añ kung neh mblàng yal hòi jà sơl uă cau, pal lòt jàu wơl ai xã in, tài bơh tŭ ñô bơñul, dilah gơjrañ nùs là ai phàu cuh den mbè gơtùi gĭt hah den tàng mpồl kwang àng bal mờ mpồl ling sền gàr tiah nhàr lơgar kung mblàng yal sơl, kung hòi jà sơl làng bol sang tĕ ờ gŏ di ngui phàu tài bơh gơ̆ rơ̆p gơlơh aniai tus tàm să he mờ hìu bơnhă he.

Thiếu tá ồng Nguyễn Thành Duy, Phó Kwang ătbồ Kwang àng xã Ia Dom, kơnhoàl Đức Cơ pà gĭt, bal mờ broă lơh pràn mblàng yal, hòi jà, ală mpồl lơh broă tàm tiah nhàr lơgar pal gĭt nền jơnau yal tơngĭt tàm ƀòn lơgar, ngui niam gơnoar broă làng bol dê tàm broă sền gàr lơngăp lơngai rơndăp tăp sèng tàm ƀòn lơgar. Thiếu ta ồng Nguyễn Thành Duy, Phó Kwang ătbồ Kwang àng xã Ia Dom, yal: Kwang àng xã bal mờ ală gah mpồl lơh broă tus bal tàm dơ̆ hòi jà, mblàng yal ai làng bol in tàm ală thôn, ƀòn lòt jàu wơl ală phan ngui, phan tam lơh, siau phàu bơrtoh. Gơlik geh bơh bàr pe nă cau geh rài kis kal ke, dùl êt nă ơruh pơnu kơnòm pa tàu blơi ală phan ngui nàng lơh phan tam lơh bơh ală cau jà blơi geh tăc tàm internet mpồl bơtiàn dê nàng crăp mòn lơh is phàu. Kwang àng xã neh kŭp ai geh 2 nơm phan ngui nàng lơh phàu mờ jàu wơl ai Kwang àng kơnhoàl in bơsong jăt jơnau cih bơh adat boh lam dê.

Bơh bồ nam tus tŭ do, làng bol neh lòt jàu ai Kwang àng kơnhoàl Đức Cơ in kờp jơh mờr 70 nơm phan tam lơh mờ phan ngui dong kờl, bal mờ bàr pe bơta siau phàu bơrtoh, phan ngui crăp mòn is phan tam lơh.