Mờr 6 rơbô Mpồl (mờ rơlao 252 rơbô nă cau) là ala măt kwang đơng lam Đảng, Dà lơgar, ală gah, mpồl lơh broă, ală ƀộ, gah lơh broă dà lơgar, ală càr, ƀòn dờng, ală mpồl ling, ală mpồl kwang bàng lơh broă mờ lơgar ndai, ala măt ală mpồl lơh broă bal mờ bơyô bơh ală lơgar, làng bol neh tus ies, pơyoa goàng bơkào, tam pà bal moăt jrùng mờ hìu nhă Tổng Ƀí thư ồng Nguyễn Phú Trọng.

Tàm nùs nhơm bơh uă làng bol dê tŭ đơs tus Tổng Ƀí thư, jơh ală làng bol ndrờm tơlik nùs nhơm git jơnau, kah pơlai ngan dùl nă cau jăk chài, sùm lơh broă jơh nùs ai broă bơ̆t bơtàu mờ bơtàu tơnguh dà lơgar in. Uă làng bol đơs là, Tổng Ƀí thư ồng Nguyễn Phú Trọng là dùl kwang đơng lam geh uă broă mờng chài, sùm ai lơh bơta pràn, bơta ngăc ngar bơh să tờm dê nàng drơng dà lơgar, rềp mềr mờ làng bol. Gam gơwèt mờ cau kơnòm să tŭ do, uă bơyô pà git mờ ală broă pơgồp bal mờ broă lơh ờ geh ơm sùm nàng ai bơta bơtàu tơnguh dà lơgar in, Tổng Ƀí thư ồng Nguyễn Phú Trọng sùm là cau lam lài àng gơcrà ngan, là bơta gơjà dờng ngan nàng rơnàng kơnòm să bơsram mờ đờm jăt bal. Mờ ală broă lơh mùl màl, rơnàng kơnòm să tŭ do pal lơh ngan, bơsram tàp jăt ơnà jăk, nùs nhơm niam bơh Tổng Ƀí thư dê nàng gơs dùl nă làng bol niam, geh uă broă lơh ai mpồl bơtiàn in. Đoàn viên Tống Tiến Quân, Mpồl Srơh lơh broă, Tỉñ đoàn càr Kon Tum pà git, nhai 07 nam do, bal mờ gùt lơgar tơngăc Tổng Ƀí thư ồng Nguyễn Phú Trọng rê tàm làng ƀồc mờ ưn ngài ală broă lơh dờng màng bơh Tổng Ƀí thư dê, să tờm sơlơ geh bơta pràn bơsram bơtơl, lơh ngan uă rơlao tai: “Wa Nguyễn Phú Trọng là dùl rùp rài dờng nàng cau kơnòm să lơh ngan gơs dùl nă đoàn viên niam, tàm tơnơ̆ do là dùl nă cau đảng viên geh bồ tơngoh ngăc ngar, lơh ngan dong kờl geh bơta kwơ ai dà lơgar in. Jơnau đơs bal mờ jơnau lời wơl bơh Wa dê ai rơnàng kơnòm să bol añ geh lơh ngan, đòm jăt sùm tàm broă lơh bơh să tờm dê”.

Jơh dùl rài Tổng Ƀí thư ồng Nguyễn Phú Trọng neh tài làng bol, tài dà lơgar, dùl nă bồ tơngoh, cau niam chài, kwang đơng lam, dùl kòn bơnus dờng màng, jơh rài kis ờ pơnhừ să, sùm niam mờ pơnyờ să ngan. Bŭ lah Tổng Ƀí thư ồng Nguyễn Phú Trọng neh sang rài, mơya ală jơnau lời wơl bơh Tổng Ƀí thư dê sùm geh tàm nùs nhơm, bồ tơngoh bơh tơl nă làng bol lơgar Việt Nam bal mờ bơta git jơnau gơboh gơbài bơh bơyô ală lơgar dê.