Să bồ rơgai lòt jăt ding dà nàng sền bơh suơn kơphe ơnàng rơlao 1 lồ tus tàm croh dà Dăk Sôr, ồng Lê Quang Lâm, kis tàm thôn Quảng Thành, xã Đăk Sôr, kơnhoàl Krông Nô sền jăt gơl tơrbŏ đah ală ding dà dê. Bơh suơn hìu ồng tus tàm croh dà pal tơrbŏ rơlao jơ̆t gơl ding dà (tơl gơl jòng 50 thơ̆k) den tàng ồng pal lòt sền nàng git ding dà geh tơrbŏ niam kơl jăp. Tŭ do, croh dà Dăk Sôr tơl lòt gan suơn kơphe hìu ồng Lâm neh soăt mìng gam gŏ ală pơnai lŭ bal mờ bràs lơm, ờ gam geh dà tai nàng tuh suơn kơphe in. Mơya bơh kông ty bơtơ̆t rơbòng dà lơh sa suơn sre, ồng Lâm geh dờp jơnau chờ, hơ̆ là tàm 2, 3 ngai tai geh dà yuh bơh tơnao dơng dà gơwèt kơnhoàl Dăk Mil tus tàm croh dà Dăk Sôr.

Ồng Lâm kung bè uă hìu neh crăp lài măi ƀồm, ding dà nàng rơcang tŭ tus dà geh ƀồm suơn kơphe in. Ồng Lê Quang Lâm đơs: “Kơlôi rơcang ngan den tàng bơh ală ngai lài tus tŭ do sào ờ bơkah, bĭc ờ lơhă do. Dà tàm croh neh soăt bơh ngai 6 Satềp tus tŭ do. Kơ̆p kờñ là dà geh tus nàng tuh suơn kơphe in nàng bañ gơtìp ro plai. Nam do añ gŏ trồ pang uă rơlao, ală nam lài dà tàm croh gam hòr sùm, ờ gơtìp soăt”.

Croh dà Dăk Sôr là dùl tàm ală croh dà dờng ngan tàm kơnhoàl Krông Nô dê, lòt gan 2 xã Dăk Sôr mờ Nam Xuân. Tàm croh dà do geh 3 broă lơh bơtơ̆t rơbòng dà mà 3 bơtơ̆t dơng dà nàng gàr dà drơng tàm broă tuh phan tam tàm kàl prang in. Mơya tŭ do, 3 bơtơ̆t dơng dà đơs is mờ croh dà Dăk Sôr đơs bal neh soăt, tàm pơgăp bơh 1 rơbô 300 tus 1 rơbô 500 lồ ù tam phan bơh làng bol lơh jăt gah croh dà di gơlan gơtìp prang ờ geh dà. Uă suơn kơphe bơh làng bol tàm tiah do tài ờ tơl dà den tàng neh gŏ ro ntê, uă làng bol lơh broă sa sào ờ bơkah, bĭc ờ lơhă tài kơlôi rơcang tŭ trồ prang.

Ồng Nguyễn Văn Đại, Kwang atbồ anih lơh broă tàm kơnhoàl Krông Nô, Kông ty Lơh bơtơ̆t rơbòng dà Dăk Nông pà git, nam do trồ prang gơtìp uă rơlao mờ uă nam. Khà tàm 33 broă lơh bơtơ̆t rơbòng dà tàm kông ty atbồ ndrờm neh gơhoài soăt uă ngan pơn drờm mờ uă nam, tàm hơ̆ geh ờ uă tiah neh soăt ngan. Kông ty neh pơgồp bal mờ ală anih lơh broă geh gơnoar, lơh broă mờ ală kơnhoàl rềp bal bè Dăk Mil, Dăk Song geh dà gam tơl nàng tam pà dà tus hờ kơnhoàl nàng dong kờl làng bol tuh phan tam in. Mơya, broă tam pà dà mìng gơtùi dong kờl làng bol geh dà tuh phan tam in tàm dơ̆ tuh dà dơ̆ 4, tus lồi nhai 4. Gam tàm nhai 5, di lah trồ tiah kung gam prang uă den git nđờ rơhiang lồ ù tam phan di gơlan gơtìp prang ờ geh dà tuh. Ồng Nguyễn Văn Đại pà git: “Lơh jăt broă tam pà 2 dơ̆ tus tàm croh dà Dăk Sôr mờ tơngai dơ̆ 1 là bơh 12 tus 15 ngai, khà dà kờp dŭ geh tam pà bơh kơnhoàl Dăk Mil mờ Dăk Song tus kơnhoàl Krông Nô là bơh 300 rơbô tus 500 rơbô khối tàm 1 dơ̆. Geh tam pà tus dơ̆ tuh dà dơ̆ 4. Tàm dơ̆ 5 gơtìp geh tàm nhai 5, di lah trồ tiah kung gam prang uă den di gơlan ờ tơl dà tàm broă tuh phan tam in”.

Ồng Doãn Gia Lộc, Kwang atbồ cơl dŭ lơh broă sa suơn sre mờ Bơtàu tơnguh ƀòn lơgar kơnhoàl Krông Nô, càr Dăk Nông pà git, kàl prang do kơnhoàl geh di pơgăp 4 rơbô 600 lồ ù tam phan pah nam, bal mờ hơ̆ kơnhoàl geh mờr 30 rơbô lồ ù tam phan jŏ tơngai. Kàl prang nam do neh geh yal lài geh gơtìp prang dờng, den tàng kơnhoàl neh lơh jăt uă broă lơh nàng tơnguh bơta pràn rơcang sơndră mờ trồ prang bè tam gơl phan tam, lơh sa tơrgùm bal, bơto sồr làng bol ngui dà tềm pềr, toah wàs rơbòng dà. Mơya, mìng rơ̆p lồi nhai 2 neh geh tiah gơtìp ờ tơl dà tuh phan tam in, den broă kàl prang jŏ tus nhai 5, nhai 6, ờ uă bă ù tam phan tàm ală xã bè Dăk Sôr, Nam Nung, Nam Xuân, Tân Thành di gơlan gơtìp ờ geh dà tuh. Kơnhoàl Krông Nô gam lơh broă mờ ală mpồl lơh broă geh gơnoar nàng tơnguh khà dà tuh ai ală tiah di gơlan gơtìp prang soăt dà in.

Ồng Doãn Gia Lộc pà git, kơnhoàl neh lơh broă mờ ală kông ty hìu măi lơh ồs đèng dà tàm dà dờng Krông Nô bè: Hìu măi lơh ồs đèng dà Buôn Kuốp, Hìu măi lơh ồs đèng dà Chư Pông Krông nàng rơcang yuh tam pà dà tàm kàl prang do, pleh mờ bơta tŭ làng bol kờñ den hìu măi lơh ồs đèng dà ờ yuh dà mờ tŭ hìu măi kờñ yuh dà den làng bol ờ gơtùi ngui dà. Ồng Doãn Gia Lộc đơs: “Bol añ kung neh yal lài bè bơta trồ prang bơh tŭ do tus lồi kàl lơh sa kờñ geh dà tuh geh gơguh uă, mơya dà kờñ drơng den gơtìp soăt rơhời. Den tàng kơnhoàl neh pơgồp bal mờ ală mpồl lơh broă bè Kông ty hìu măi lơh ồs đèng dà Buôn Kuốp, Kông ty lơh bơtơ̆t rơbòng dà Dăk Nông bal mờ ờ uă broă lơh tơnao dơng dà hìu măi lơh ồs đèng dà tàm càr, lơh geh tơngai tam pà dà tuh ai tiah hờ đah jum dà dờng Krông Nô in, tàm hơ̆ geh 07 xã kis jăt gah dà dờng do là gơtìp bal tơn, tam pà dà tuh di pal”.