Gùt xã Cư̆ Drăm geh rơlao 47 lồ ù bơh 137 hìu gơwèt tàm tiah toh ù nàng drơng tàm broă lơh gùng ntoăt jờl. Kờp tus jơh nhai 4 pa do, neh geh 124 hìu dờp dong kờl mờ jào ù ai ală mpồl lơh broă in, 13 hìu gam tai ờ hềt dờp ring bal, jào ù.

Kờp jơh bă ù toh bơh 13 hìu tàm thôn Cư̆ D’hiăt, xã Cư̆ Drăm là mờr 8 sào, 13 hìu geh lơh mờ mpàn bal mờ ờ uă broă lơh dong kờl ndai. Ù lơh hìu ơm tàm do là ù sơgràm ờ di mờ adăt boh lam, den tàng tŭ toh ù ờ pal ai ù lơh hìu, tơm ntrờn ù tiah, mờ mìng dờp priă dong kờl ntrờn hìu mờ phan bơna tàm bă ù. Tơnơ̆ mờ broă lam sồr, 13 hìu làng bol do neh ring bal, dờp priă dong kờl ntrờn mờt 1 tơmàn 600 tơlăk đong nàng rê ơm tàm tiah ơm kis pa.