Ồng Y Dhun Hmok, kra ƀòn ƀòn Dur 1 kung gam kah bè ờs ală bơta đềt mềr lơbơn niam bơh Tổng Ƀí thư ồng Nguyễn Phú Trọng dê tŭ rê còp mờ tus bal Ngai chờ Tam klac ală jơi bơtiàn xã Dur Kmăl, kơnhoàl Krông Ana, càr Dăk Lăk tàm lồi nam 2018. Ồng pơn yờ să ngan geh ala mat làng bol tàm ƀòn pà Tổng Ƀí thư in àu kòn cau ờs mờng cau Rơđê dê. Ồng Y Dhun Hmok kah wơl: “Wa đơs là: làng bol pal tơrgùm lơh sa nàng tơnguh niam rài kis, oh kòn den pal geh bơsram sră là bơta kơp kờñ Wa dê. Den tus tŭ do làng bol geh tơl sa, tơl ngui, oh kòn geh bơsram sră, hơ̆ là bơta chờ hờp ngan. Ƀòn lơgar den geh tam gơl pa. Làng bol tàm ƀòn ưn ngài ngan nùs nhơm lơbơn niam Wa dê neh lời ai làng bol Dur Kmăl in”.

Ai ồng Hmyet, Ƀí thư Ci ƀộ mờ là kwang atbồ thôn ƀòn Tiêng 2, xã Tân Sơn, ƀòn dờng Pleiku, càr Gia Lai kung gam kah bè ờs ngan dùl nă kwang đơng lam bồ pơn dềt să, đềt mềr: “Nam 2011, Wa Nguyễn Phú Trọng geh lòt còp 2 ƀòn kòn cau Jarai bol he dê tàm xã Ia Tiêm mờ xã Ayun, kơnhoàl Chư Sê. Làng bol bol hi gŏ Wa đềt mềr mờ sền gròi ngan tus làng bol. Wa là dùl nă kwang đơng lam bồ song ring, neh đơng lam bồ Đảng he dră wơl bơta sa kuề sa kuà, lơh geh uă cồng nha niam. Añ mờ làng bol kòn cau Jarai pin dờn ngan kơnờm geh Đảng mờ broă lơh sa mpồl bơtiàn, rài kis làng bol Tây Nguyên bol hi dê rơp tam gơl niam rlau”.

Ai lơh pơlai soh, nđàc sơnggit ngan gơ wèt mờ Tổng Ƀí thư ồng Nguyễn Phú Trọng, ồng Bon Yô Soan, cau geh bơngă pin dờn tàm ƀòn dờng Dà Làc, càr Lâm Đồng ai tơnggŏ bơta pin dờn tàm broă lơh đơng lam bồ, bơt bơtàu dà lơgar bơh Đảng dê: “Broă lơh dră wơl, rơcang lài kơryan sa kuề sa kuà, broă ờ niam gơ wèt mờ kwang bàng đảng viên geh Wa Nguyễn Phú Trọng lam lơh kràñ ngan, ờ geh tiah ờ ai. Tŭ do, làng bol jơi bơtiàn dồ êt nă cau càr Lâm Đồng sùm iat, jat mờ pin dờn tàm bơta đơng lam bồ bơh Đảng dê”.