Tàm 2 dơ̆ tus còp, lơh broă tàm càr Kon Tum tàm nam 2011 mờ nam 2017, Tổng Ƀí thư ồng Nguyễ Phú Trọng ndrờm lời tŭ tơngai lòt còp, jòi gĭt bơta geh ngan tàm rài kis, iăt kơno nùs nhơm, bơta kơ̆p kờñ bơh làng bol jơi bơtiàn dồ ết nă cau dê. Nùs nhơm pơn dềt să, rềp mềr, ală jơnau lùp còp jơh nùs, jơnau nting tơngkah gơ mut tàm nùs nhơm làng bol bơh Tổng Ƀí thư dê kung gam geh làng bol càr Kon Tum cih kah sùm.

Ồng A Bát, ơm tàm thôn Kon Rờ Bàng 2, xã Vinh Quang, ƀòn dờng Kon Tum, ngoh rơngăc đơs: "Nam 2017 làng bol geh tìp mat Wa Nguyễn Phú Trọng tơn tàm do, kra ƀòn jàu ai Wa in dùl nơm ào kòn cau bơh tiah do dê. Wa Tổng Ƀí thư còp să, lùp còp làng bol, Wa kŭp tê mờ tơl nă cau, nting tơngkah làng bol pơn đơl pràn lơh ngan lơh sa ờ gŏ di iăt jơnau đơs bơh cau ờ niam dê bơchồc. Iăt jơnau nting tơngkah bơh Wa Nguyễn Phú Trọng dê den làng bol ƀòn Kon Rờ Bàng 2 tam klăc bal, jơm klòm bal tŭ do den ƀòn lơgar he dê bơtàu tơnguh tam gơl uă ngan. Tŭ kơno yal jơnau muat jrùm Wa neh sang rài bol añ muăt jrùm ngan, cau lơi kung muăt jrùm lơm, cau lơi kung gơ dan ñìm lơm”.

Là cau geh bơngă pin dờn tàm ƀòn làng bol kòn cau Rơđê, uă dơ̆ tus bal ală broă lơh niam chài bơh yau kòn cau tàm càr lơgar Hà Nội, cau chài jak ngan bèp H’Loan dê ơm tàm ƀòn Ako Dhông, sơnah ƀòn Tân Lợi, ƀòn dờng Buôn Ma Thuột, càr Dăk Lăk yal, Tổng Ƀí thư ồng Nguyễn Phú Trọng là kwang đơng lam bồ ờ geh bơta yah ngài, sùm đềt mềr, iat bơta kơp kờñ, nùs nhơm làng bol dê. Kơnờm ală broă lơh nền di ngan bơh Đảng dà lơgar dê mờ bơta sồr lơh bơh Tổng Ƀí thư dê, tiah kơh bơnơm, tiah nhàr dà lơgar, tiah jơi bơtiàn dồ êt nă cau neh tam gơl, bơtàu tơnguh pràn ngan.

Bèp H’Loan dê đơs: “Ai nùs nhơm pơlai soh hơ̆ nàng he sơrlèt gan ală kal ke, lơh jat gùng dà đơng lam bơh Đảng, bơh Dà lơgar dê, tàm hơ̆ geh jơnau sồr lơh bơh Tổng Ƀí thư ồng Nguyễn Phú Trọng dê. Mìng is gơ wèt mờ să tờm añ là cau gam kis, añ pal tơngkah làng bol, tơngkah kòn sau, lơh ngan, pơn đơl pràn bơt bơtàu Tây Nguyên in bơtàu tơnguh, pơgồp bơnah bơta bơtàu dà lơgar ngai sơlơ bơtàu tơnguh rlau, niam rlau”.

Kơno yal Tổng Ƀí thư ồng Nguyễn Phú Trọng sang rài, làng bol ală jơi bơtiàn tàm xã Quảng Tâm, kơnhoàl Tuy Đức, càr Dăk Nông pơlai soh ngan ờ gĭt lơh. Kah jơnau Tổng Ƀí thư nting tơngkah, pơndờm pơnđiang làng bol tàm dơ̆ lòt còp xã Quảng Tâm bơh 12 nam lài, làng bol ală ƀòn sùm tam klăc bal, dùl nùs bal pin dờn tàm bơta đơng lam bơh Đảng, Dà lơgar, sơm bat tê bal bơt bơtàu ƀòn lơgar, Dà lơgar ngai sơlơ pas niam.

Bi Điểu Ngót, kòn cau M’Nông, Ƀí thư Đoàn Ơruh pơnu Kộng sản Hồ Chí Minh tàm xã Quảng Tâm, kơnhoàl Tuy Đức, càr Dăk Nông, đơs: “Kơno yal Tổng Ƀí thư sang rài, rơnàng kơnòm să tàm xã pơlai soh uă ngan dùl nă kwang đơng lam bồ geh bồ tơngoh, nùs nhơm khin cha, tryang tryồng jơh nùs tài làng bol, cau sùm lời ală nùs nhơm is ồn ngan ai rơnàng kơnòm să mờ tiah sar lơgar ngài in. Bol añ rơnàng ơruh pơnu sùm cih kah sùm jơnau Tổng Ƀí thư dê nting tơngkah, pal sùm lơh jat niam nùs nhơm tam klăc bal, dùl nùs bal, pin dờn tàm bơta đơng lam bơh Đảng, Dà lơgar dê. Bol añ rơ̆p pơn đơl pràn lơh ngan bơsram, lơh sa, bơtàu tơnguh lơh sa, lơh ngan bơt bơtàu ƀòn lơgar, Dà lơgar ngai sơlơ pas niam”.