VOV4.K’ho- Ală ngai do, nùs nhơm gờm chờ Sơntờm Dà lơgar ngai 2/09 gam  tơngŏ tàm làm jơh gùt ală ƀòn lơgar Tây Nguyên dê. Tàm ƀòn Phôk, xã Ea Rbin, kơnhoàl Lăk, dùl ƀòn tiah sar lơgar ngài bơh càr Dăk Lăk dê, bồng bi pơr hê sơmañ rơmĭt gơ par làm gùt gùng lòt. Ồng Y Blor Lưk, kwang atbồ ƀòn Buôn Phôk, xã Ea Rbin pà gĭt, nùs nhơm hô hơng bơh ngai Sơntờm dà lơgar tơngkah làng bol in kah wơl bơhiàn tam klăc bal, jat gùng dà broă lơh bơh Đảng, Dà lơgar dê nàng bơt bơtàu ƀòn lơgar ngai sơlơ pas niam. Ồng Y Blor Lưk, đơs: Dơ̆ 1 bol añ sùm mblàng yal ai làng bol in yồng bồng bi nàng cih kah ngai 2/09 Ngai Sơntờm Dà lơgar, bơta chờ hờp dờng. Kung bè pah nam, tơl hìu bơnhă ndrờm yồng bùng bi. Bol añ mblàng yal ai làng bol in gĭt wă tai bè bơta kwơ dờng màng bơh Ngai Sơntờm Dà lơgar là Ngai Sa tềp lơngap lơngai is bơh jơi bơtiàn dê. Kah ơn ngài Bác Hồ mờ ală  cau neh chơ̆t phi să ai dà lơgar in, ală cau geh màng mờ kăc màng, làng bol lơh jat gùng dà broă lơh bơh Đảng mờ Dà lơgar dê. Làng bol tam klăc bal, tŭ hòi jà sơm bat tê bal tài kes priă cau rƀah, mìu càl rbŭt dờng, dà kŏ dà cò halà dong kờl cau gơtìp sơnơm khih dioxin lơh aniai làng bol sùm tus bal jơh nùs ngan.

Ồng Đinh Đăm (kòn cau Bahnar) là kra ƀòn thôn Kon Sơ Nglok, xã Hà Đông, kơnhoàl Đăk Đoa, càr Gia Lai. Lòt ling bơh nam 1963, ồng Đinh Đăm sền gŏ tam lơh tàm Tây Nguyên cui rơcai ngan, uă cau ling bal neh phi să nàng sền gàr rài lơngăp lơngai is. Bè hơ̆ den tàng, ồng Đinh Đăm sùm kah ưn ngài Bác Hồ neh đơng lam làng bol ai geh bơta lơngăp lơngai is jơi bơtiàn, khat gơboh, gơboh gơbài bè ngai do: “Bác Hồ là cau neh crơng gơs dà lơgar Việt Nam Zân củ Kộng hoà, cèng wơl gơboh gơbài ai làng bol in. Kơnờm geh tơngklàs, jat jơnau Bác Hồ bơto tơngkah, làng bol chờ hờp, tam klac bal, lơh ngan lơh broă lơh sa, pơlam, tàm đòm jat gơp bè bơta chài ròng phan, tam phan cèng wơl cồng nha lơh sa uă. Bơh tŭ tơngklàs tus tŭ do, rài kis neh tam gơl uă ngan. Lài do ờ geh rơndeh măi, tŭ do den jơh ală hìu bơnhă ndrờm geh rơndeh măi lơm, hơ̆ sồng jơh bal rơndeh lơ òr drơng broă lơh sa. Mìng is xã Hà Đông tŭ do geh nđờ jơt nơm rơndeh lơ òr tơn. Hơ̆ sồng geh tivi, tùh mrềt geh lơm, rài kis neh tam gơl uă ngan”.

Tàm tiah nhàr lơgar Tuy Đức, càr Dăk Nông, ală ngai do bềng ală bồng bi Dà lơgar dê, tơngkah kir sơnrai Ngai Sơntờm Dà lơgar 2/09. Ồng Y Thái, Phó Ƀí thư Huyện ủy Tuy Đức pà gĭt, kơnhoàl geh uă ngan bơhiàn yau kăc màng, là ƀòn lơgar tờm bơh cau ling khin cha jơi bơtiàn kòn cau N’Trang Lơng – cau đơng lam dơ̆ ntàu tam lơh tam dră bòl sò tơm Tây sơgràm phà Tây Nguyên ală nam bồ rài 19 dê; geh ù tiah pôs đồng kăc màng Quảng Trực- dùl tiah tờm tàm rài tam lơh tam dră mờ  Mỹ tơngklàs dà lơgar. Ngui niam bơhiàn yau kăc màng, ală nam do, làng bol ală jơi bơtiàn kòn cau tàm Tuy Đức pơn jat tai tam klăc bal, dong kờl bal mờ gơ̆p bơtàu tơnguh lơh sa. Ồng Y Thái, pà gĭt: Jat tàm ală cồng nha neh lơh geh, kơnhoàl neh lơh jat Nghị quyết bè broă lơh tơrmù rƀah kơ̆ kơljap tàm ală ƀòn làng bol kòn cau ơm kis bơh jŏ tàm tiah do dê, tàm hơ̆ ai lài bơta pràn gơwèt ală broă lơh lời ai kơnhoàl rƀah in, broă lơh bơtàu tơnguh rài kis phan bơna nùs nhơm ai làng bol kòn cau dùl ết nă cau in mờ broă lơh bơt bơtàu ƀòn lơgar pa nàng tơrgùm bơcri priă ai làng bol in. Ală xã bơt bơtàu broă lơh broă rơndap lơh lơh jat ngan ngồn, di pal mờ tơl ƀòn, tàm bơrlŭ bal ală bơta pràn  lơh jat. Huyện ủy tàm pà broă lơh, jàu kơnòl broă ngan ngồn ai tơl nă kwang bàng tàm Ƀan Thường vụ in pal jat sền tơn, sồr ngan ù tiah ƀòn lơgar, pal lơh ngan mờ lơh geh cồng nha ngan, lơh niam broă lơh jat geh cồng nha broă tơrmù rƀah tàm ală ƀòn in.

Cau mblàng K’Hạnh