Tàm ală ngai do, kơno yal làng bol ală càr tàm tiah đah Tô dà lơgar he gam pal àñ kong hoàc hươr kơn jơ̆ ngan tài bơh mìu dà tih tơnơ̆ dơ̆ mìu càl rbŭt dờng sồ 03 lơh aniai, bi Nguyễn Hồng Tố Diễm, ơm kis tàm ƀòn dờng Pleiku, càr Gia Lai neh rơcăng bàr pe bơta phan sa mờ dà sàng goh nàng dong kờl làng bol tiah dà kŏ dà cò in. Ală phan bơna geh bi jun tus tiah ơn tơrgùm bal, geh rơndăp niam ngan nàng ơm kơ̆p rơndeh pơndiang lòt jun. Bi yal: Añ mờ mi ùr, bàr nă oh mờ mi bal mờ gơ̆p pơyua dồ êt phan ai làng bol tàm tiah mìu càl rbŭt dờng in, kung kơ̆p kờñ sơl là ală oh mi bulah gùng ngài kung rơ̆p jun tus ai làng bol in. Kung kơ̆p kờñ là tơl nă cau rơ̆p dong ai làng bol in tàm ală tiah gam kong hoàc hươr.

Lơh gơrề nùs nhơm “Nha ngan glòm nha sèt”, uă cau tàm ù tiah càr Gia Lai kung hòi jà cau kwèng, gơ̆p bơyô tă pơgồp bal ƀung mi, dà hùc mờ sơnơm tơm ba nàng pơyua dong kờl làng bol tiah dà kŏ dà cò ală càr tiah đah Tô dà lơgar in. Bi Võ Phi Hổ, cau tờm rơndeh Phi Hổ, lòt jăt gơl gùng Gia Lai- Đà Nẵng pà gĭt, tơnơ̆ tŭ geh jơnau hòi jà tơn, tàm mho ngai 11/09 neh geh uă ngan cau geh nùs nhơm niam tus tàm tiah ơn tơrgùm bal nàng pơyua ală phan bơna kờñ pal geh tàm rài kis, tam pà bal ală kal ke mờ làng bol uă tiah tàm tiah đah Tô dà lơgar gam pal kong. Bi Võ Phi Hổ, đơs: Añ ñă ntàu hòi jà nàng làng bol càr Gia Lai in tàm sơmbăt tê bal cèng ală phan pà, bơta kờñ gơboh bơh làng bol càr Gia Lai dê wèt tus hờ làng bol tàm tiah đah Tô dà lơgar. Mờ añ kung kơnờm bơh gơnoar ătbồ tiah do nàng jồm anih sok vĕ bơh Sươn nhơl Đồng Xanh là anih ơn tơrgùm bal dờp phan ngui sa kờñ pal geh tàm rài kis tài bơh anih do geh ƀlàng ù ơnàng mờ rơndeh ờ kơryan bơta pơndiang kơn jơ̆.

Kung tàm ngai 11/09 sơl, Duh broă sùm Tỉñ ủy càr Gia Lai geh sră đơng mhar sồr ală kâp ủy, anih lơh broă, ală tiah tàm càr sơrbac mhar lam lơh hòi jà tă pơgồp, dong kờl làng bol gơtìp hoàc hươr. Tơngai lam lơh bơh tŭ do tus jơh ngai 13/09 nam 2024. Bơh priă jền anih lơh broă he dê, Anih duh broă Mặt trận dà lơgar Việt Nam càr Gia Lai kung jàu dong kờl khà priă 400 tơlak đong pơyua tus làng bol ală càr tiah đah Tô dà lơgar in.

Tàm càr Dăk Lăk, bơh ală broă lơh loh làng, làng bol ală jơi bơtiàn tàm càr Dăk Lăk gam geh ală broă lơh tam pà bal mờ làng bol tiah đah Tô dà lơgar kong hoàc hươr kơn jơ̆ bơh trồ tiah lơh aniai, tơnggŏ nùs nhơm tàm kờñ gơboh bal, tam klăc bal kờñ gơboh bal mờ gơ̆p bơh jơi bơtiàn Việt Nam dê.

Tàm kơnhoàl Lăk, tiah geh tus 66% là làng bol jơi bơtiàn dồ êt nă cau ơm kis, làng bol gam bal mờ gơ̆p tă pơgồp ngai lơh broă, cau den tă pơgồp phan bơna sơrbac mhar lơh geh ală “Khàr boh khuah kờñ gơboh” pơyua làng bol tiah đah Tô dà lơgar in tàm tŭ jiơ gơtŭ gơtơl. Làng bol neh ờ gŏ ngòt bòl glar kal ke àñ ală sơ̆ khuah phòng mờ hìu dê tam geh cèng tus tiah ơn tơrgùm bal tàm hìu Yàng Phờk Quảng Trạch, xã Dăk Liêng, kơnhoàl Lăk nàng dong kờl.

Tàm càr Kon Tum, Mpồl Lơh kơnòl broă sùm Tỉñ đoàn càr Kon Tum hòi jà ală kâp ƀộ Đoàn bal mờ rlau 33 rbô nă đoàn viên, ơruh pơnu tàm càr tă pơgồp dong kờl làng bol bơsong jơnau gơlời wơl tài bơh mìu càl rbŭt dờng dà kŏ dà cò lơh aniai. Dơ̆ hòi jà tă pơgồp dong kờl làng bol geh Tỉñ đoàn càr Kon Tum lơh tàm 05 ngai, bơh mho ngai 11/09 tus jơh ngai 15/09 do. Tơnơ̆ dơ̆ lam lơh bal mờ nùs nhơm niam jơh ală kwang bàng, kông cưk, viên cưk anih lơh broă Tỉñ đoàn càr Kon Tum neh dồ nùs bal tă pơgồp dong kờl làng bol tiah mìu dà tih tiah đah Tô dà lơgar. Bi Nguyễn Văn Mạnh, Phó Ƀí thư Duh broă sùm Tỉñ đoàn càr Kon Tum, pà gĭt: Mpồl Lơh kơnòl broă sùm Tỉñ đoàn càr kung neh yal tus jơh ală mpồl đoàn ală kơnhoàl, ƀòn dờng in. Bal mờ hơ̆, kung là dồ gah tàm tơn tìp mờ ală cau geh nùs nhơm niam. Ală mpồl đoàn kơnhoàl, ƀòn dờng geh ală anih dờp phan dong kờl cau dê jun. Jơh ală phan ngui sa kờñ pal geh tàm rài kis tàm ù tiah ƀòn dờng dê kung bè ală kơnhoàl dê tơrgùm tàm ƀlàng dờng. Bơh hơ̆, Mpồl Lơh kơnòl broă sùm Tỉñ đoàn lùp mờ ală anih jun pơndiang phan ờ sa priă lòt jun ai làng bol tiah đah Tô dà lơgar in nàng dong kờl làng bol sơrlèt đah tŭ tơngai bòl glar kal ke ngan do.