VOV4.K’ho- Liêng Srôñ là xã tiah 3 bơh kơnhoàl Đam Rông, càr Lâm Đồng dê. Kơnờm tam gơl mờng quèng lơh sa mờ tềm pềr tàm broă tă priă dơ̆ ngui den tàng rài kis nùs nhơm, phan bơna bơh làng bol K’ho tàm tiah do dê neh hời rơ hời tam gơl mờ bơtàu tơnguh. Gơ rờm bal tàm bơta chờ hờp wă rò nam pa bơh gùt lơgar dê, làng bol tàm Liêng Srôñ wă rò sa tềp bơhiàn Ñâm Zần chờ hờp mờ ram mhŭ.

Ală gơl gùng lòt bơh tiah tàm gùl xã rê tus ală thôn, ƀòn geh làng bol pès, wàs sàng  goh ngan. Bồng bi dà lơgar àng gơ crà ngan tàm hìu pơrjum ƀòn, àng gơ crà kềng 2 gah gùng lòt tus ală tiah tờm thôn dê. Ồng Dơng Gur Ha Tưng, kra ƀòn tàm thôn 5, xã Liêng Srôñ pà git: Thôn 5 geh 167 hìu bơnhă. Hìu bơnhă lơi kung geh tơl kòi phe, phan sa, ƀañ kèu, mứt, tơrnờm wă rò sa tềp. Hìu bơnhă ồng Dơng Gur Ha Tưng geh rài kis pas sơm ngan rlau jơh tàm thôn, tài ồng geh 5 lồ kơphe mờ 6 sàu kòi sre bal mờ mpồl kơnrồ geh 16 nơm. Nam pa do, hìu bơnhă lơh geh rlau 300 tơlak đông. Sa tềp do, bơdìh mờ tă dơ̆ ngui blơi phan sa tềp ai hìu bơnhă in, ồng gam tă 5 tơlak đông nàng lơh piang sàu lồi nam jà làng bol tàm ƀòn tus bal: “Jat bơhiàn bơh rài yau, làng bol bol hi ờ sa tềp bơhiàn, mơya tŭ do, đơs ngan là pơgap 10 nam do, hìu bơnhă añ kung git sa tềp bơhiàn bè oh mi cau Yoan sơl. Nàng chờ hờp sơnam pa, wă rò sa tềp, hìu bơnhă añ neh rơcang lài phe, tềm pềr priă jền dơ̆ ngui tàm nam tàm dơ̆ dơ̆ ngui tàm dơ̆ sa tềp wil tơl rlau. Kàl lơh sa pa do, hìu bơnhă añ kung tơnhàu geh đal, kòi tơnhàu geh uă, kơphe tơnhàu kung geh sơl, den tàng broă lơh sa kung kơ̆ kơljap đau. Sa tềp nam do, hìu bơnhă wă rò sa tềp bơ tòm mat bal, wil tơl đau, bơdìh mờ bañ kèu nàng wă oh mi, làng bol tus nting bơr sa tềp, hìu bơnhă añ gam blơi àu mpha pa ai kòn sau in. Bè phan sa tàm ngai sa tềp, bơdìh mờ iar ơda, hìu bơnhă añ gam lơh tai sur nàng sa tềp, tai bơh hìu bơnhă geh gal cau”.

Hìu bơnhă bi Ka Thi gơ wèt hìu bơnhă rƀah bơh thôn 5 dê. Bi geh 4 nă kòn, 2 nă kòn tơnhua lòt lơh ơpah tàm ƀòn dờng Hồ Chí Minh. Tài gơ rềng bơh kòp Kovid-19 dê den tàng nđờ nhai do ờ hềt geh rê tàm hìu. Kung bơtuah là kàl lơh kơphe pa do tàm xã, tàm kơnhoàl ờ tơl cau pik kơphe den tàng jơh dùl hìu bơnhă geh 5 nă cau lòt pik ơpah kơphe sùm 2 nhai tơn, lơh geh mờr 45 tơlak đông. Gơ wèt mờ hìu bơnhă bi Ka Thi, do là khà priă dờng ngan. Bi Ka Thi pà git, neh tă 5 tơlak đông nàng blơi phan sa tềp: “Nàng rơcang ai sa tềp bơhiàn, wă rò nam pa do in, hìu bơnhă añ kung blơi bañ kèu, rơcang mbar nàng klơm. Bulah ờ bè pah nam, tài gơ rềng bơh kòp bơtờp, nam do hìu bơnhă añ sa tềp dềt đau, kung blơi bañ kèu, klơm mbar, kòn dềt den kung blơi àu mpha pa nàng soh tàm ală ngai sa tềp”.

Mò Lơ Mu Ka Rit, Củ tịc Mpồl cau lơh broă sa xã Liêng Srôñ pà git, bulah nam do broă lơh sa kal ke mơya kung gam geh ală mpồl lơh sa kă bro, cau geh nùs nhơm niam tus pà rlau 200 bơnah phan sa tềp ai ală hìu bơnhă geh rài kis kal ke tàm gùt xã in, tàm hơ̆ geh mờr 40 hìu bơnhă tàm thôn 5. Làng bol tàm jơi nòi, tàm thôn ƀòn kung tàm dong kờl, tam pà bal mờ gơp tơl nơm iar, ơda, poac sur mờ mbar nàng klơm. Hìu bơnhă lơi kung geh tơl bơta nàng wă rò sa tềp ram mhŭ: “Tài gơ rềng bơh kòp Kovid-19 dê, kàl lơh kơphe nam pa do hìu bơnhă añ bulah tac yòm đau, mơya khà tơnhàu gơmù, mìng tơl priă jền nàng dơ̆ ngui tàm hìu bơnhă, den tàng sa tềp nam do hìu bơnhă añ mìng sa dềt lơm. Sa tềp nam do, hìu bơnhă añ mìng geh bañ, mứt, mbar nàng klơm kơnơm. Bè phan sa tàm ală ngai sa tềp hìu bơnhă geh tai iar ơda sa tàm ală ngai sơnam pa, chờ hờp sa tềp”.

Sa tềp bơ tòm mat bal, ram mhŭ tàm tơl hìu, kra ƀòn thôn 5 ồng Dơng Gur Ha Tưng đơs: “Añ là cau lơh krơh lài ai kòn sau in đòm jat, añ kơp kờñ kòn sau geh jat krơh añ dê mờ ală broă mờ añ neh lơh ƀòn lơgar in. Nam pa, añ kơp kờñ kòn sau pràn kơldăng, git lơh sa tàm nam pa nàng lơh gơlik uă kòi, uă tơngời, uă kơphe, hìu bơnhă ngai sơlơ hờm răm mờ wă rò dùl nam pa ram mhŭ, bơ tòm mat bal”.

Cau mblàng K’Duẩn