VOV4.K’ho - Bal mờ gùt lơgar, kwang bàng, cau ling sền gàr tiah nhàr dà lơgar càr Dăk Nông kung gam rơcang wă rò dùl kàl nam pa. Mơya chờ nam pa ờ huĭ kơnòl, ală cau ling tàm tiah nhàr dà lơgar gam lơh ngan, rơcang lài nàng sền gàr bơta lơngăp lơngai tàm tiah nhàr dà lơgar.       

Nùs nhơm wă rò satềp nam pa Ñhâm Zần nam 2022 gam rơcang tàm tiah nhàr dà lơgar càr Dăk Nông, bơta àng gơcrà nam pa gam geh tàm gùt pôs ling. Mờ kwang bàng, cau liing, pôs ling là hìu, tiah nhàr dà lơgar là ƀòn lơgar, satềp tàm tiah nhàr dà lơgar kung bè satềp tàm hìu, geh mbar, geh plai chi pơdơng, geh bơkào đào, bơkào mai mờ geh nùs nhơm chờ hờp.

Kwang bàng, cau ling tàm pôs ling Dăk Tiên, gơwèt mpồl ling sền gàr tiah nhàr dà lơgar càr Dăk Nông sền gròi, sền gàr ñjrong nhàr dà lơgar di tàm satềp

Nam sơnrờp wă rò satềp tàm tiah nhàr dà lơgar, Binh nhất Lầu Văn Hiện, Mpồl ling phào crong, pôs ling sền gàr tiah nhàr dà lơgar Dăk Tiên, mpồl đơng lam ling sền gàr tiah nhàr dà lơgar càr Dăk Nông pà git, broă sền gròi, lam sồr bơh kwang đơng lam bal mờ broă rơcang nền nòn bơh Pôs ling nàng geh dùl nùs nhơm satềp chờ hờp, hờm ram neh dong kờl ală cau ling bè bi tơmù nùs nhơm kah hìu mờ kung git loh làng gơnoar, kơnòl bơh să tờm dê tàm tiah nhàr dà lơgar: “Nam do là nam sơnrờp ngan oh wă rò satềp tàm tiah nhàr dà lơgar. Oh mi tàm Pôs ling kung bè oh mi tàm hìu, kis bal niam mờ tam pà bal ală broă. Oh chờ hờp ngan, pơnyờ să ngan là cau ling. Nam pa geh jơnau chờ gờm pơyoa tus ală cau tàm hìu nhă, gơ̆p bơyô, cau pròc mhàm là chờ gờm dùl nam pa ală cau ndrờm pràn kơl dang mờ pas gơs”.

Bơh mpàng tê chài bơh ală kwang bàng, cau ling tiah nhàr dà lơgar, ală mbar lom pòng geh drơng tàm ală dơ̆ sào sa ngai satềp neh rơcang tơl. Phan sa ndai kung geh rơcang sơl, neh geh lài tàm suơn, sùm kloh tơlir niam mờ di pal tơl mờ briă drơng ngui sa tàm satềp. Thiếu tá Lương Văn Phú, Cíñ trị viên phó Pôs ling sền gàr tiah nhàr dà lơgar Dăk Tiên, Mpồl đơng lam ling sền tiah nhàr dà lơgar càr Dăk Nông pà git, mpồl ling neh lơh niam broă nus nhơm mờ kwang bàng, cau ling ndrờm iang nùs chờ nam pa, wă rò satềp: "Nùs nơm bơh ală cau ling tŭ do ndrờm chờ hờp, mờ neh rơcang tơl ală bơta phan nàng gàr niam broă wă rò satềp. Ală cau ling neh ai lài nùs nhơm nàng lơh jăt ală kơnòl broă geh jào”.

               Pơgồp bal mờ ală mpồl ling tàm tiah nhàr dà lơgar sền gàr gùng ñjrong nhàr dà lơgar

Kung bè uă broă satềp ndai, satềp Ñâm Zần nam 2022 do bơh mpồl ling sền gàr tiah nhàr dà lơgar càr Dăk Nông, bơdìh mờ sơlào piang cau ling, sùm là ală ngkơr phào. Ală cau ling sền gàr tiah nhàr dà lơgar wă rò satềp, chờ nam pa, iăt ală săp ntas tàm tiah nhàr dà lơgar, tŭ lơi kung rơcang lòt lơh jăt kơnòl. Sơlơ mờr satềp den broă lòt sền gròi tàm ală pôs ling sền gàr tiah nhàr dà lơgar sơlơ geh lơh uă. Ală kơnòl sền gàr bơh ală pôs ling sền gàr tiah nhàr dà lơgar sơlơ geh lơh. Ală kơnòl sền gàr gơnoar tờm ù tiah kung gam bơyai lơh sùm. Khà ling tàm ală pôs ling sền geh tơl mờ rơcang lơh jăt mờ ală kơnòl geh jào. Broă lòt sền gròi, sền cau, rơndeh lik mŭt tàm tiah nhàr dà lơgar geh lơh niam, nàng pơgồp bal tàm broă atbồ, sền gàr kơl jăp gùng nhàr dà lơgar, ñjrong nhàr dà lơgar mờ gơnoar tờm ù tiah nhàr dà lơgar mờ rơcang sơndră mờ kòp Kovid-19 geh cồng nha. Trung tá Nguyễn Huy Hiếu, Atbồ Pôs ling sền gàr tiah nhàr dà lơgar Dăk Tiên, Mpồl đơng lam ling sền gàr tiah nhàr dà lơgar càr Dăk Nông pà git: “Geh Đảng, Dà lơgar, làng bol jào kơnòl atbồ, sền gàr tiah nhàr dà lơgar, dan hơ geh lơh jăt kơnòl, bơyai lơh atbồ, sền gàr nền nòn tiah nhàr dà lơgar, ù tiah, git ală bơta, pơgồp bal mờ ală mpồl lơh broă nàng tam dră geh cồng nha ală bơta tìs, lơh ngan lơh gơs jăk chài kơnòl tàm dơ̆ satềp”.

Càr Dăk Nông geh gùng nhàr dà lơgar jòng di pơăp 142 kơi sồ lòt gan 7 xã tiah nhàr dà lơgar bơh 4 kơnhoàl là Cư̆ Jút, Dăk Mil, Dăk Song mờ Tuy Đức. Tàm jơh ală ƀòn bơh 7 xã tiah nhàr dà lơgar do ndrờm neh geh crơng gơs ală mpồl atbồ is gùng nhàr dà lơgar, ñjrong nhàr dà lơgar. Ală nam do, tàm hơ̆ uă ngan là tàmm ală dơ̆ satềp, broă pơgồp bal bơh mpồl ling sền gàr tiah nhàr dà lơgar mờ ală mpồl cau atbồ is ƀòn lơgar, ală mpồl ling rơcang gàr lài xã neh gŏ cồng nha tàm broă sền gròi, rơcang sơndră mờ broă tiă gan gùng nhàr dà lơgar, sơgràm, tam dră nàng kơrian geh cồng nha ală broă lơh tìp tàm gơl gùng nhàr dà lơgar. Đại tá Nguyễn Văn Lư, Kwang atbồ đơng lam mpồl ling sền gàr tiah nhàr dà lơgar càr Dăk Nông pà git, bal mờ broă bơ̆t bơtàu broă sền gàr tiah nhàr dà lơgar bơh gùt làng bol, ling sền gàr tiah nhàr dà lơgar càr kung neh lơh jăt broă lơh bal mờ lơgar ndai tàm broă sền gàr tiah nhàr dà lơgar. Tàm hơ̆ uă ngan là tàm bơta kòp Kovid-19 gơtìp kal ke, broă lơh bal mờ lơgar ndai sền gàr tiah nhàr dà lơgar neh geh ală tam gơl di pal, geh cồng nha. Bơh tŭ hơ̆, pơgồp bal tàm broă tơnguh gơnoar tam klăc bal, git gơ̆p bal đah bàr lơgar, gàr niam tiah nhàr dà lơgar bơh dà lơgar dê: “Tàm tơngai tiah đah ne gơtìp kòp gơtờp den bol añ pal tam gơl broă lơh bal mờ lơgar ndai pa, ờ gơtùi tìp tơn, bol añ geh lơh jăt cih pang sră jào, bơh gùng che điện thoại mờ tìp bal ờ uă, tìp bal tàm taih nhàr dà lơgar. Gơtùi đơs, mờ ală broă lơh do, tam gơl broă lơh den bol añ kung geh geh lơh sùm, geh jơnau yal, tam gơl bal jơnau tơngit mờ pơgồp bal tàm broă atbồ, sền gàr gơnoar tờm ù tiah mờ sền gàr niam bơta lơngăp lơngai ờ do ờ dă tàm tiah nhàr dà lơgar bơh tơl lơgar dê”.

Broă tus bal, rơcang tàm broă lơh jăt ală kơnòl bơh mpồl ling sền gàr tiah nhàr dà lơgar tàm càr Dăk Nông neh mờ gam pơgồp bal kwơ màng nàng gàr niam, ờ do ờ dă mpồl bơtiàn tàm tiah nhàr dà lơgar càr dê. Tàm hơ̆ uă ngan là di tàm satềp do, bơta kơ̆ kơl jăp bơh ală cau ling neh cèng geh bơta lơngăp lơngai ai làng bol in wă rò satềp.

Cau mblàng Ndong Brawl