Drim òr (22/08), Ƀộ trưởng Ngoại giao ồng Bùi Thanh Sơn mờ Ƀộ trưởng Ngoại giao lơgar Australia ring bal đơng lam Pơrjum Ƀộ trưởng Ngoại giao đah lơgar Việt Nam mờ lơgar Australia dơ̆ 5 di tàm tŭ mò Penny Wong còp mùl màl lơgar Việt Nam dơ̆ bàr. Do là kơrnoăt geh lơh sùm pah nam đah bàr Ƀộ Ngoại giao dê. Tàm pơrjum, bàr gah tơrgùm cri bơyai bè broă lơh jăt bơta git gơ̆p jŏ jòng đah lơgar Việt Nam mờ lơgar Australia.

Sền wơl tàm tơngai do, lơh bal lơh sa kă bro đah bàr lơgar bơtàu tơnguh pràn, jăt mờ hơ̆ priă geh bơh kă bro nam 2022 neh tus mờr 16 tơmàn dolar Mỹ, ai lơgar Việt Nam gơs lơgar kă bro dờng dơ̆ 10 lơgar Australia dê mờ lơgar Australia gơs lơgar kă bro dờng dơ̆ 7 lơgar Việt Nam dê. Ală gah lơh broă bal pa bè sơndră mờ tam gơl trồ tiah, tam gơl năng lượng gam geh sền gròi mờ lơh pràn; tàm hơ̆ geh khà priă dong kờl 105 tơlăk dolar Australia mờ lơgar Australia lời ai lơgar Việt Nam in nàng bơ̆t bơtàu phan bơna sơndră mờ tam gơl trồ tiah mờ bơtàu tơnguh năng lượng kloh. Ƀộ trưởng Ngoại giao lơgar Australia đơs tờm, lơgar Australia sền kwơ broă lơh bal mờ kờñ bal gơnoar tờm bơh mpồl ASEAN dê; ring bal pơn jăt tai lơh pràn lơh broă bal tài bơta bơtàu tơnguh kơl jăp bơh tiah dềt Mekong dê; hơ geh dong kờl lơgar Việt Nam sơndră mờ tam gơl trồ tiah mờ bơtàu tơnguh năng lượng kloh.