Jơnau yal tàm pơrjum, Ƀộ trưởng Kế hoạc mờ Đầu tư ồng Nguyễn Chí Dũng pà git, broă lơh sa mpồl bơtiàn nhai 9, quý III mờ 9 nhai tàm nam 2023 pơn jăt tai brồ guh wơl pràn, mờ neh ai gŏ 10 bơta geh pơnrơ ngan tàm hơ̆ đơs tờm: Gơguh brồ guh pràn, quý tơnơ̆ uă rơlao mờ quý lài, kờp bal 9 nhai gơguh 4,24% gơwèt mpồl lơgar gơguh lơh sa uă tàm tiah do mờ tàm dunia. Ală gah, mpồl lơh broă tờm brồ guh wơl, bơtàu tơnguh kơl jăp, tàm hơ̆ uă ngan là gah lơh sa mờ măi mŏk pơn jăt tai gơguh wơl.

Tàm pơrjum, kwang đơng lam ală ƀộ, gah lơh broă dà lơgar, ală càr, ƀòn dờng đơs niam broă đơng lam, lam lơh pràn kơl dang, di pal bơh Cíñ phủ, Thủ tướng cíñ phủ di tŭ bơsong ală bơta gơkòl bơh ală càr, ƀòn dờng dê. Jơnau đơs pơn dŭt pơrjum, Thủ tướng Cíñ phủ ồng Phạm Minh Chính neh ai gŏ loh cồng nha neh lơh geh, bơta lơi gam ờ pràn mờ jơnau bơsram broă mờng chài. Tàm tơngai tus Thủ tướng hòi jà ală kấp, ală gah broă, ală càr, ƀòn dờng pal rơcang nền nòn ală gùng dà broă lơh, jơnau gơlik geh lài, broă lơh nàng rơcang sơndră pràn kơl dang, geh cồng nha, pơn jăt tai lơh jăt jơnau kờñ tơrgùm bal là kơl jăp lơh sa dờng, sền gròi khà priă gơguh kas ir, lơh pràn broă gơguh lơh sa, gàr niam rài kis làng bol; gàr kơl jăp cíñ trị mpồl bơtiàn, lơngăp lơngai gùt mpồl bơtiàn...