Pơrjum dơ̆ 10 bơh Anih lơh broă dờng ngan rơlao jơh bơh UNESCO bè sền gàr phan lời wơl niam chài ờ di phan bơna 2003 neh sền gŏ broă tus bal bơh 183 lơgar tàm mpồl mờ rơlao 100 nă kwang bàng sền gròi.

Đơs tàm Pơrjum sơn đờm bơh Dơ̆ pơrjum, Thứ trưởng Ngoại giao, ồng Hà Kim Ngọc đơs nền lơgar Việt Nam mờ 15 bơta phan lời wơl niam chài ờ di phan bơna neh geh cih măt, 550 bơta phan lời wơl niam chài ờ di phan bơna kấp dà lơgar, sùm sền gròi sền gàr phan lời wơl niam chài ờ di phan bơna, geh lơh sùm mờ lơh gơs gùng dà broă lơh, adăt boh lam dà lơgar, pa do ngan là Broă lơh jăt jơnau kờñ Dà lơgar dê bè Bơtàu tơnguh bơta Niam chài tus nam 2045, mờ Adăt phan lời wơl niam chài tam gơl. Ală lơgar tàm mpồl Kông ướk 2003 đơs niam ală broă lơh mờng chài, git wă mờ lơh ngan bơh lơgar Việt Nam dê tàm broă sền gàr mờ ngui phan lời wơl niam chài ờ di phan bơna nàng pơgồp bal tàm broă sền gàr jal mhar ală phan lời wơl di gơlan gơtìp roh, prăp gàr ală phan lời wơl ala măt kòn bơnus mờ yal ală rùp rài phan lời wơl geh sền gàr niam tàm dunia.