Tàm dơ̆ tus còp mờ lơh broă tàm lơgar Lào, Mpồl kwang bàng Hội đồng Zân tộk Quốk hội lơgar Việt Nam geh Củ tịc Hội đồng Zân tộk ồng Y Thanh Hà Niê Kdăm lam bồ neh tus tìp Củ tịc Quốk hội lơgar Lào ồng Xaysomphone Phomvihane mờ đơng lam bal dơ̆ cri bơyai broă mờng chài bè broă kòn cau mờ Củ ñiệm Ủy ƀan Ală kòn cau Quốk hội lơgar Lào.

Tàm dơ̆ wă, Củ tịc Hội đồng Zân tộk ồng Y Thanh Hà Niê Kdăm neh yal bè cồng nha lơh broă bal đah Hội đồng Zân tộk Quốk hội lơgar Việt Nam mờ Ủy ƀan Ală kòn cau Quốk hội lơgar Lào tàm tơngai do, gùng dà broă lơh bal gah kòn cau đah bàr lơgar dê. Lài mờ hơ̆, Hội đồng Zân tộk Quốk hội lơgar Việt Nam mờ Ủy ƀan Ală kòn cau Quốk hội lơgar Lào neh pơgồp bal bơyai lơh pơrjum cri bơyai tam pà bal jơnau tơngit, broă mờng chài bè broă bơ̆t bơtàu adăt boh lam mờ jăt sền broă lơh jăt ală broă bè broă kòn cau, tơmù rơƀah kơl jăp, gàr niam broă lơh sa mpồl bơtiàn; cri bơyai broă mờng chài tàm broă jăt sền, tơnguh bơtàu ƀòn lơgar, tơn jơh jơgloh tơmù rơƀah, ai geh broă lơh kơl jăp làng bol in... Lơgar Việt Nam mờ lơgar Lào tơnguh broă lơh bal đah ală anih lơh broă lơh broă kòn cau.