Tổng Ƀí thư ồng Nguyễn Phú Trọng đơs loh gùng dà cri bơyai broă lơh bal mờ lơgar ndai lài mờ tơnơ̆ bơh lơgar Việt Nam dê là krơi is, lơh tờm, ring lơngai, git gơ̆p lơh bơyô bal, lơh broă bal mờ bơtàu tơnguh; uă bơta, uă lơgar tàm bơta git gơ̆p cri bơyai broă lơh bal mờ lơgar ndai. Tổng Ƀí thư ồng Nguyễn Phú Trọng mờ Kwang atbồ lơgar Mỹ ồng Joe Biden ring bal là bơta mùl màl neh rơlao pà gŏ ală bơta kwơ màng lài ngan gơwèt mờ broă bơtàu tơnguh bơh bơta git gơ̆p đah lơgar Việt Nam mờ lơgar Mỹ là broă git jơnau bal tơl ală kơrnoăt tờm mờ gùng dà ai geh bơta git gơ̆p đah bàr lơgar dê.

Tổng Ƀí thư đơs tờm tus mờ bơta git wă bal, rài kis bơh tơl lơgar dê, git jơnau mờ ală bơta kwơ di pal bơh tơl lơgar dê mờ ờ sơmờm tàm broă lơh krơi is bơh tơl lơgar dê sùm geh kwơ màng. Tổng Ƀí thư đơs niam ală tơngu me geh ring bal đah kwang đơng lam bàr lơgar bè Jơnau yal bơr bal bè broă tơnguh uă bơta kwơ bơta git gơ̆p đah lơgar Việt Nam mờ lơgar Mỹ gơguh Broă lơh bal Jŏ jòng Tơl ală bơta tài bơta Ring lơngai, Lơh broă bal mờ Bơtàu tơnguh kơ̆ kơl jăp. Jăt mờ hơ̆, Tổng Ƀí thư ồng Nguyễn Phú Trọng đơs tờm tus mờ ờ uă gùng dà broă lơh dờng nàng lơh pràn bơta git gơ̆p đah lơgar Việt Nam mờ lơgar Mỹ. Tàm hơ̆ geh broă pơn jăt tai tơnguh bơta git wă bal, lơh geh ală kơrnoăt gùng dà broă lơh, ai geh bơta kơl jăp jŏ jòng, tìp bal, lơh broă bal kấp dờng, đah ală gah broă, ală kấp, tìp bal làng bol.