Tàm dơ̆ pơrjum, bàr gah đơs nền gĭt gơ̆p Tam klăc lơh broă bal Jŏ jòng tai đah Việt Nam mờ Thái Lan ngai sơlơ bơtàu tơnguh jrô ơnàng làm uă mờ ngan ngồn, jăt tàm bơta ki ngàm, pin dờn bal mờ gơ̆p mờ geh kwơ bal. Bàr gah kung dồ nùs ring bal pal tơnguh tai tìp măt làng bol, ngan là đah rơnàng kơnòm să, bơh ală broă lơh niam chài, tàp pràn să jan, lòt nhơl, bơto bơtê; bơto tai dà Thái tàm lơgar Việt Nam mờ dà Yoan tàm lơgar Thái Lan. Bal mờ hơ̆, bàr gah đơs sùm bơta kwơmàng bơh lơh broă bal prăp gàr mờ ngui niam ală bơta kwơ niam chài, kah yau lơgar Việt Nam dê tàm lơgar Thái Lan; hòi jà bơtàu tơnguh ală rơndăp broă lơh tài mpồl bơtiàn kơ̆ kơl jăp lơgar Thái Lan dê tàm Việt Nam.

Tàm dơ̆ pơrjum, bàr gah neh cribơyai bè broă lơh rơcăng ai dơ̆ lòt còp lơgar Việt Nam bơh Thủ tướng lơgar Thái Lan dê mờ đơng lam bal dơ̆ pơrjum Cíñ phủ bal dơ̆ 04. Ƀộ trưởng Ƀộ Ngoại giao lơgar Việt Nam ồng Bùi Thanh Sơn đơs wih đơs wơl Thủ tướng Cíñ phủ lơgar Việt Nam ồng Phạm Minh Chính kơ̆p kờñ ngan geh wă rò Thủ tướng lơgar Thái Lan tàm tơngai tus.