Mờ ală bơta lơi neh lơh geh pà gŏ, tơl dùl dơ̆ lơh chờ là tơl dơ̆ càr Dăk Lăk lơh ngan lơh pràn lơh sa mờ bơtơl bơta niam chài kơphe. Dùl bă suơn chài rơgơi uă bơta, gam ai geh bơta pràn nàng càr Dăk Lăk rơhời wèt tus jơnau kờñ dờng bơh càr Dăk Lăk dê.

Ồng Đỗ Như Ý, kis tàm ƀòn dờng Hà Nội là dùl tàm git nđờ jơ̆t rơbô nă cau năc tus bal sền jơh Lơh chờ kơphe Buôn Ma Thuột dơ̆ 8. Gơwèt mờ ồng, Lơh chờ kơphe dơ̆ do neh lời wơl bơta niam bơnĕ tàm tơl broă lơh. Ồng kung geh nùs nhơm niam mờ kơphe Buôn Ma Thuột bal mờ broă geh bal bơh ù tiah geh is, kòn bơnus bal mờ bơta chài rơgơi bơh ù tiah do dê: “Añ neh tus bal lơh chờ kơphe Buôn ma Thuột bơh tŭ bơsram tàp đơs crih tamya, wèt tus lơh chờ tàm gùng drà, mang đơs crih tamya, lơh chờ bơta àng gơcrà. Añ neh hùc dà kơphe tềng gùng Phan Đình Giót... añ gŏ là lơh chờ nam do niam ngan, chờ hờp ngan, trồ tiah mrềt niam, kòn bơnus niam, dà kơphe bơkah mờ geh uă bơta niam Tây Nguyên dê”.

Tàm tŭ cau năc bơh tiah ngài kah sùm tus mờ 5 ngai lơh chờ geh uă jơnau đơs crih tamya, bơta àng gơcrà, uă bơta niam chài rơgơi bal mờ nùs nhơm kờñ gơboh mờ cau năc bơh tiah lơh kơphe dê, den ală cau bơyai lơh chờ mờ ală broă lơh geh dờp bal tàm ală kơnhoàl, thị xã tàm càr, kung gam dờp bal bơta niam bơnĕ gơlời wơl do. Ồng Hồ Sỹ Trung, cau tờm suơn kơphe V’Ori, kơnhoàl Krông Păc, càr Dăk Lăk pà git, do là dơ̆ sơnrờp ngan bal mờ ală anih lơh broă tàm kơnhoàl bơyai lơh lơh dờp bal Lơh chờ kơphe Buôn Ma Thuột dơ̆ 8, mơya neh ai geh bơta tơngŏ niam bơnĕ ngan. Măi klài dà kơphe tàm Tiah tềl kah yau rài rài do Dà lơgar dòr kơphe Cada neh lơh broă lơh bơta pràn nàng drơng cau năc tus sền tiah lơh kơphe bơh gờñ ngan tàm lơgar Việt Nam dê, còp gùng lơh wơl bè rài lài do bơh broă lơh kơphe rơlao 100 nam lài tàm ù tiah do dê. Ồng Hồ Sỹ Trung kơ̆p kờñ, ală ngai lơh chờ pa do ờ mìng geh lời wơl bè dùl bơta pal kah niam, mờ gam bơtơl nùs nhơm kờñ gơboh gơwèt mờ kơphe, hòi jà tai cau kơnòm să tus bal tơnguh bơtàu gah phan geh lơh, bơ̆t bơtàu bơta chài rơgơi kơphe ai càr Dăk Lăk in: “Ngai lơi kung gal ngan cau tus mờ chờ hờp ngan tŭ geh sền lơma lơh broă tàm suơn kơphe, hơ̆ sồng hùc dà kơphe mờ tus sền broă lơh tàm gùng dà lơh kơphe lơgar Việt Nam dê, ală cau kơnòm să tus tàm thư viện kơphe mờ git bơta kwơ bơh suơn kơphe Cada sơnrờp ngan bơh kơphe lơgar Việt Nam dê geh uă bơta hơ̆ tus mờ jơh ală bơyô in nàng gơtùi geh tai dùl gùng dà broă lơh jŏ jòng...”.

Tàm mpồl cau gal tus mờ Lơh chờ kơphe Buôn Ma Thuột dơ̆ 8, ồng Nguyễn Văn Lạng, Củ tịc UɃÑZ càr Dăk Lăk lài do là cau neh sền jơh 8 dơ̆ lơh chờ. Là dùl tàm ală cau ai geh Lơh chờ kơphe, ồng Nguyễn Văn Lạng đơs, tus dơ̆ 8 geh bơyai lơh, càr Dăk Lăk ờ mìng geh tus mờ broă lơh chờ dờng rơlao; uă bơta, jăk chài rơlao mờ gam geh lơh nền nòn mpồl bơtiàn loh làng mờ pin dờn rơlao. “Lơh chờ do ờ mìng geh bal ală broă lơh bơh gah lơh kơphe dê, mờ gam pơgồp bal ală broă lơh ndai, tơlik bơta pràn bơh càr Dăk Lăk dê, cau tus là gŏ geh hơ̆ là ƀòn dờng bơh kơphe dê, làng bol cau lơi kung gơwèt mờ kơphe, cau lơi kung gơtùi gơs cau tờm yal bè kơphe, hơ̆ là mpồl bơtiàn geh tus bal, pơnyờ să yal mờ cau năc mờ dunia in”.

Kung là cau tus bal sền jơh 8 dơ̆ lơh chờ, mờ pơgồp bal nền nòn mờ mpồl bơtiàn kơphe lơgar Việt Nam dê, Tiến sĩ Trịnh Đức Minh, Củ tịc Mpồl kơphe Buôn Ma Thuột đơs là, Lơh chờ dơ̆ 8 neh mùl màl kah tus ală tơngu me niam bơh bơta chài rơgơi kơphe, tŭ geh pơgồp bal git nđờ jơ̆t workshop mờ tolkshow tàm ală broă lơh. Tiến sĩ Trịnh Đức Minh đơs, lơh chờ dơ̆ do geh cồng nha bè broă yal geh cồng nha bơh gah lơh kơphe bal mờ bơta niam chài rơgơi Tây Nguyên dê, mờ cồng nha ai gùng dà nàng ală broă lơh di pal tàm broă tơnguh bơtàu gah lơh phan kơphe mờ bơtơl bơta niam chài kơphe tơnơ̆ do in tai: “Lơh chờ dơ̆ do yal ai làng bol in gŏ uă bơta geh gŏ dờng ơnàng bơh bơta niam chài kơphe dê. Bè ală workshop, bè là dùl dơ̆ boh bơr dềt yal phan klài mờ ĭt dà kơphe. Ha là boh bơr bè hùc dà kơphe phin den đơs bè lơi. Lơh chờ rơhời dong kờl ai cau ngui in wă bơta kwơ mùl màl bơh kơphe dê mờ lơh niam rơlao tai kơphe nàng lơh nhơl chờ”.

Lơh chờ kơphe Buôn Ma Thuột dơ̆ 8, geh bơyai lơh tàm uă bơta tơngŏ ƀuơn, mờ khà priă kơphe tăc geh uă mờ kơl jăp bal mờ ală anih prăp kơphe bơh càr Dăk Lăk dê kung gam uă, mờ 5 ngai lơh chờ trồ tiah ndrờm tơngai, mrềt niam, mờ ală rơndăp broă lơh dờng bơh Buôn Ma Thuột dê gam tàm tơngai lơh gơs. Ồng Trần Đức Nhật, Phó Củ tịc UɃÑZ ƀòn dờng Buôn Ma Thuột pà git, ƀòn dờng kung tàm nam sơnrờp lơh jăt kơrnoăt krơi is neh geh Quốk hội kĭ, gam kơlôi sơnơng bơ̆t bơtàu rơndăp broă lơh ƀòn dờng Buôn Ma Thuột gơs ƀòn dờng kơphe dunia dê... Den tàng, cồng nha bơh lơh chờ kơphe dơ̆ 8 geh kwơ màng ngan tàm tơngai tus. “Bơyai lơh geh cồng nha lơh chờ kơphe Buôn Ma Thuột dơ̆ 8 do là tơngu tờm nàng bol añ lơh gơs, bơtơl tàm tơngu me bơ̆t bơtàu khà măt kă bro Buôn Ma Thuột gơs ƀòn dờng bơh dunia dê, ai geh bơta lơi là tờm, bơta lơi là kơnòl tờm mờ ƀòn dờng Buôn Ma Thuột pal geh lơh tàm tơngai tus. Kơ̆p kờñ là ƀòn dờng Buôn Ma Thuột rơhời geh là dùl anih tus nàng tŭ đơs tus ƀòn dờng Buôn Ma Thuột bơh lơgar Việt Nam dê là đơs tus dùl ƀòn dờng kơphe dunia dê”.

Rơlao 100 nam tờm kơphe tơnguh bơtàu tàm càr Dăk Lăk, mờr 20 nam lơh chờ kơphe Buôn Ma Thuột geh bơyai lơh, Tờm kơphe neh gơmŭt jrô tàm rài kis bal mờ bơta niam chài rơgơi bơh ală jơi bơtiàn kòn cau tàm càr do dê, lơh geh uă tus tàm gùt Tây Nguyên bal mờ gùt lơgar. Bal mờ lơh chờ kơphe 2 nam 1 dơ̆, càr Dăk Lăk-Buôn Ma Thuột gam gơs tiah tờm bơyai lơh ală dơ̆ pơrlòng kơphe bơkah lơgar Việt Nam dê, ai kơphe bơkah lơgar Việt Nam lòt gùt dunia; neh bơ̆t bơtàu geh cồng nha bơta niam kơphe, ù tiah niam mờ geh bơta kwơ lơh sa uă. Bơdìh hơ̆ tai, Lơh chờ cing mồng, Lơh chờ nam pa bơh ală jơi bơtiàn kòn cau Tây Bắc, Đông Bắc, Lơh chờ nam pa Quan họ Bắc Ninh kung ngai sơlơ geh lơh bal tàm ù tiah do sơl. Tiah suơn niam chài geh uă ntê, uă bơta mờ tờm là lơh sa bơta niam chài kơphe dê, gam lơh geh bơta pràn ai càr Dăk Lăk brồ guh rơhời tus mờ jơnau kờñ dờng càr do dê: bơ̆t bơtàu ƀòn dờng Buôn Ma Thuột gơs anih tus bơh kơphe dunia dê.