Măt tơngai rơ̆p pa lik, ồng Hồ Sỹ Trung, cau tờm suơn dờng V-Ori tàm xã Ea Yông, kơnhoàl Krông Păc, càr Dăk Lăk neh tus còp suơn kơphe gam sùh mhoal. Nền nòn sền bơkào gam mờr tam gơl bơh tơlir tus bò, ồng Trung lơh phan tuh dà, bŭ lah tàm suơn tŭ lơi kung geh dà. Ồng Trung pà git, do là dùl broă lơh kỹ thuật nàng tơnjŏ tờm kơphe lì bơkào, gàr niam geh suơn kơphe lì bơkào bò niam, ƀô thồm, drơng cau năc tus nhơl chờ mờ lơh chờ kơphe Buôn Ma Thuột dơ̆ 8: “Bol añ gam rơcang pah ngai, nàng bal mờ ƀòn lơgar bal mờ làng bol lơh broă sa nàng chờ gờm ală cau tus nhơl sền. geh dùl jơnau hơ là geh ai kơphe lì bơkào di tàm ngai lơh chờ, bơh ngai 10 tus ngai 14. Di lah pơrgon ngai bơkào kơphe lì den ngai do he tuh dà, nàng geh ală ntê bơkào lì bò niam, thồm tàm suơn kơphe. Chờ gờm ală cau tus mờ Lơh chờ kơphe Buôn Ma Thuột mờ tus mờ kơnhoàl Krông Păc”.

Nhai 3 tàm càr Dăk Lăk là kàl lơh chờ, kung là kàl bơkào kơphe lì niam. Mơya bơkào bò niam lơh geh khà măt kă bro càr Dăk Lăk dê lì ndrờm bal jơh. Tơl suơn mìng lì 2 dơ̆ mờ tơl dơ̆ mìng jŏ tàm 3 ngai. Den tàng, uă cau tờm suơn kơphe tàm càr neh bơceh lơh geh dà bơkào kơphe nàng gơtùi prăp gàr bơta bơkah tàm uă nhai. Gam cau năc, geh ờ uă cau neh rơwah tus mờ Buôn Ma Thuột bơh lơh chờ kơphe lài do, nàng geh sền bơkào ris mờ hùc dà ce. Mò Mai Thị Thu Thuỷ, cau năc tus bơh càr Ninh Bình neh tus ƀòn dờng Buôn Ma Thuột bơh lồi nhai 2, den tàng mò neh tus sền bơta niam bơkào kơphe tàm ală suơn bal mờ hùc dà ce pa, dơ̆ sơnrờp geh hùc. Mò Thủy đơs: “Tơnơ̆ mờ tŭ neh tus sền tàm suơn kơphe gam lì bơkào, kŭp rùp mờ suơn bơkào kơphe, mờ geh hùc dà ce bơkào kơphe bè do niam bơnĕ ngan. Mờ añ kơlôi cau ùr geh kờñ gơboh ngan mờ broă hùc dà bè do”.

Lơh chờ kơphe Buôn Ma Thuột dơ̆ 8 nam 2023 sơn đờm mùl màl tàm mang do là dùl lơh chờ pa is ngan. Hơ̆ ờ mìng là ală tơngu me pa geh mpồl bơyai lơh rơwah, bơh ală mpồl cau năc dunia tus pơgồp bal lơh chờ mờ ală bơta niam chài bơh dà lơgar hơ̆ dê, bơh uă bơta kơphe mờ mpồl klài dà kơphe lơgar Việt Nam mờ gùt dunia. Lơh chờ kơphe Buôn Ma Thuột dơ̆ do gam pa is tài ală broă lơh geh dờp bal tàm ală tiah tàm càr, tiah geh ală suơn tờm sầu riêng, plai gơ-àl, plai jràng, plai kroăc, plai bung... kung gam lì bơkào niam, thồm; geh ală ƀòn mpong săp dròng cing, mồng mờ geh uă nùs nhơm kờñ gơboh mờ cau năc. Tàm ală tiah, ƀòn làng bol càr Dăk Lăk ndrờm gŏ loh làng să tờm he là cau tờm bơh dơ̆ lơh chờ mờ geh wă cau năc mờ ală bơta niam ngan di lah geh. Lŏ H Tít Aliô, kis tàm ƀòn Akŏ Dhông, ƀòn dờng Buôn Ma Thuột, do là dùl ƀòn pa geh dờp là ƀòn nhơl chờ mpồl bơtiàn đơs: “Kàl lơh chờ do ờ mìng geh gơrềng tus mờ kơphe mờ gam là bơta chài rơgơi kòn cau Rơđê kis tàm ƀòn dờng Buôn Ma Thuột dê, den tàng ƀòn chờ hờp ngan mờ kơ̆p gơn. Añ gơlơh gŏ là ƀòn chờ hờp ngan rơlao, gam dong kờl bal lơh mhar broă rơcang nàng drơng Festival kơphe do in. Ƀòn geh ală broă lơh bè dròng cing, phan sa, geh ờ sa priă tŭ hùc dà kơphe tai. Tàm ƀòn den geh ală hìu tus bal lơh bè hìu ồng Y Ray, Tăng Bi, hìu tăc dà kơphe A Rul, hìu tăc dà kơphe Akŏ Dhông kung gam rơcang mhar ai broă lơh Festival dơ̆ do in”.

Rơlao 100 nam kis mờ dờng tàm tiah kơh bơnơm Dăk Lăk, bal mờ bơta kwơ lơh sa dờng màng, kơphe ai geh bơta đềr chài rơgơi, pơgồp bal bơta chài rơgơi bơh mờr 50 jơi bơtiàn kòn cau tus bơh 3 tiah đah Tô tàm Gùl mờ đah Jum dà lơgar dê. Bơh tŭ hơ̆, ai geh dùl kàl lơh chờ jŏ ngai, lơh ơnàng tus tàm gùt ù tiah, bơh lơh chờ bơta chài rơgơi ală kòn cau hờ tiah đah tô măt tơngai mŭt, đah tô măt tơngai lik, tus mờ lơh chờ nam pa quan họ Bắc Ninh, tus mờ lơh Chờ kơphe mờ Lơh chờ Sầu riêng. Lơh chờ kơphe Buôn Ma Thuột dơ̆ 8, bơh ngai 10 tus ngai 14 nhai 03 geh cèng tus cau năc in gŏ jơh dùl jơnau yal jŏ jòng bè kơphe bal mờ ală bơta lơi mờ tờm kơphe neh lơh geh ai ală jơi bơtiàn kòn cau kis tàm bă ù tiah do in.