Tạ Thị Thùy Linh mờ Nguyễn Mai Thảo Anh là 2 nă đảng viên pa geh ơm tàm mpồl bơh Đảng dê. Jơh bal 2 nă ndrờm là kơnòm bơsram jak 12 nam tơn. 03 nam kâp pe ndrờm jơh nùs ngan tus bal lơh ală srơh lơh broă bơh Đoàn Ơruh pơnu dê. Khi là Cau ătbồ phó ătbồ drơng bơsram sră, là Phó Ƀí thư Ci đoàn ơdŭ dê. Thùy Linh rơ̆p mŭt bơsram Hìu bơsram Đại họk Rơcăng ồs sa mờ Crùh ồs sa, ai Thảo Anh rơ̆p mŭt Đại họk Adăt, Đại họk Dà lơgar Hà Nội. Tạ Thị Thùy Linh yal bơta ngoh rơngăc tŭ geh ơm tàm mpồl Đảng dê: Tŭ geh mŭt tàm mpồl Đảng dê den oh sơlơ lơh ngan tàm tơl broă lơh. Sùm lơh ngan bơsram gơ in jak mờ rơ̆p geh tă pơgồp geh kwơ ai mpồl bơtiàn in.

Nguyễn Mai Thảo Anh den pà gĭt: Mè bèp oh mờ ală wa tàm hìu bơnhă là đảng viên den tàng oh geh bơta pin dờn tàm Đảng. Mè bèp oh kung tề lam oh dồ bơnah bơta gĭt wă ai oh in. Mè bèp kờñ ngan mờ dong kờl oh.

Klau pơgru Trần Văn Công, Ƀí thư Ci ƀộ 2, Đảng ƀộ Hìu bơsram Kâp pe Buôn Đôn pà gĭt: Nam bơsram 2020- 2021 Hìu bơsram Kâp pe Buôn Đôn tơmŭt đảng bơh sơnrờp là kơnòm bơsram. Do là dùl bơta tam gơl uă ngan bơh Đảng ƀộ dê, tài bơh tŭ hơ̆ ờ dồ êt nă pơgru là đảng viên gam kơlôi sơnơng, ờ hềt lơh nền. Mờ mè bèp bơh kơnòm bơsram dê kung đơs là: mŭt Đảng gờñ ir mờ sơnam do. Pơgru Trần Văn Công, đơs: Gơ wèt mờ ală làng bol jak ngan, nàng tề lam mờ tơmŭt Đảng là dồ broă kwơmàng ngan gĭt lơh. Den tàng bè hơ̆, bơdìh mờ gah cau pơgru ătbồ ơdŭ, gah đảng viên ngan ngồn tề lam ai ală oh in den bol hi sùm lùp mờ hìu bơnhă nàng hìu bơnhă dong kờl tai ai ală oh in. Nàng tŭ mŭt tàm mpồl bơh Đảng dê là iang nùs ngan mờ gĭt nền jơnau kờñ niam bơnĕ ngan dồ bă loh làng nàng pơnđơl sùm tàm jơh rài kis he dê.  

Ùr pơgru bơto bơta văn là bi Trịnh Thị Dung, cau neh neh jŏ sơnam bơto kơnòm mờ lơh pơgru ătbồ ơdŭ tàm 10 nam đơs là: Broă tề lam ai kơnòm bơsram in nùs kờñ gơboh dà lơgar mờ gĭt wă bè Đảng bè jơnau kờñ niam bơnĕ ngan kăc màng dê, bơta kơ̆p kờñ gơn kơnờm pơnđơl bơsram tàp bơh să tờm dê là broă lơh kwơmàng ngan, ngan là gơ wèt mờ kơnòm bơsram ơdŭ 12. Ùr pơgru Trịnh Thị Dung, đơs: Là dồ nă đảng viên jăt sền yal tơnggĭt ală đoàn viên mờ ci ƀộ in, kung bè sền swì ală oh mi den añ ai geh jơnau mờng chài, lài ngan tŭ mờ dong ai ală kơnòm bơsram in gĭt wă bè jơnau kờñ niam bơnĕ ngan bơh Đảng dê kung bè nùs kờñ gơboh dà lơgar den gŏ ală oh pơnđơl pràn, lơh ngan rlau; dơ̆ bàr tai là wă wờng rlau tàm uă broă bè tàm rài kis kung bè tàm bơsram sră.

Klau pơgru Trần Vĩnh Trung, Phó Ƀí thư Đảng ủy, Phó Kwang ătbồ Hìu bơsram Kâp pe Buôn Đôn đơs nền: broă tề lam mờ tơmŭt kơnòm bơsram tàm Đảng sùm geh kâp ủy sền gròi. Đảng ủy ờ ntoăt jăt cồng nha bơdìh gời halà khà mờ sùm pal geh bơta niam. Klau pơgru Trần Vĩnh Trung, đơs: Đảng ủy sùm jăt sền ală đảng viên bơh hìu bơsram dê neh tơmŭt, neh jàu pơrjum tàm ală hìu bơsram đại họk, kao đẳng tàm gùt lơgar. Bơh sền swì den ală oh mi do bơtàu tơngguh niam ngan jơnau tơl pràn, bơta pràn jak bơh he dê. Jơh nùs ngan lam lài lơh krơh tus bal lơh ală broă lơh tàm ală hìu bơsram đại họk, mờ là dùl tàm ală cau pơnrơ bơh srơh bơh ơruh pơnu ală hìu bơsram đại họk dê.

Kơnhoàl Buôn Đôn geh 2 hìu bơsram kâp pe. Tàm tơngai lơh broă do, neh tơmŭt đảng ai 18 nă kơnòm bơsram in. Is ồn nam bơsram 2023- 2024, geh 6 nă kơnòm bơsram geh chờ hờp geh ơm tàm mpồl Đảng dê. Ồng Ngô Cự Tâm, Kwang ătbồ Mpồl rơndăp broă Huyện ủy kơnhoàl Buôn Đôn pà gĭt: Pah nam, Anih tờm tề lam cíñ trị bơh kơnhoàl dê pơgồp bal mờ Đảng ủy 2 hìu bơsram kâp pe nàng pờ ală ơdŭ tề lam gĭt wă bè Đảng tàm hìu bơsram. Lơh geh cau tơmŭt đảng tơn bơh tàm hìu bơsram kâp pe, nàng tŭ lik klờng, mŭt tàm rài kis, ală oh neh gĭt nền loh jơnau kờñ niam bơnĕ ngan mờ bơta kơ̆p kờñ dờng bơh he dê. Ồng Ngô Cự Tâm, đơs: Tơnơ̆ tŭ kơnòm bơsram lik klờng rê hờ ƀòn lơgar den Đảng ƀộ kơnhoàl sền gròi ngan, đơng lam, sồr ală đảng ƀộ, ci ƀộ gơ wèt bal kung bè ci ƀộ kâp hơđơm sền gròi, dong kờl. Ai tơl bơta ai ală oh in pơn jăt tai lơh ngan nàng mŭt tàm mpồl Đảng dê.