Ală gah phan lơh tìs uă ngan tàm hơ̆ geh: Phan dơm chi ală bơta, phơng sih, sơnơm sền gàr phan tam, phan bong hàng să, ào mpha, khŏ, zép; phan nhơl kơnòm dềt, jràu chu blơi bơh lơgar ndai.

Tàm dơ̆ pơrjum tơn jơh broă lơh sơndră mờ broă kă bro tìs mờ adat boh lam, blơ̆ blăc kă bro, phan ờ ngan bơyai lơh mho ngai 06/01, ồng Nguyễn Tuấn Hà, Phó Củ tịc Ủy ƀan Ñân zân càr Dăk Lăk đơs là, bulah khà priă lơh glài bơh broă lơh tìs gơguh pơndrờm mờ nam lài, mơya kung ờ hềt di mờ bơta geh ngan bè ală broă lơh tìs tàm gah phan bơna tàm ù tiah càr dê. Tàm tơngai tus ală gah lơh broă geh gơnoar pal jat sền di bơta gơlik geh tàm drà kă bro, tơnguh uă cồng nha broă lơh yal tơngĭt lài, rcang lài tơl làm ală bơta nàng gàr niam bè ờs giă drà kă bro dê, ngan là tàm tơngai sa tềp Qúy Mão mờr tus.