Mờ điện thoại ngac ngar geh tơrbŏ mạng internet, mìng nggui tàm hìu, ồng Y Kơn Niê (mat mờng hòi ồng Uyên dê) ơm tàm ƀòn Ea Đun, xã Ea Kênh, kơnhoàl Krông Păk kung gam gơtùi ƀuơn ngan tơm priă đèng, blơi card điện thoại. Ồng Y Kơn yal, bơh tŭ broă lơh “Ƀòn làng bol ơm kis kông nghệ sồ” geh lam lơh tàm ƀòn, ồng mờ uă cau neh git rlau bè lơi là kông nghệ sồ mờ rơhời ngui kông nghệ sồ tàm ală broă lơh pah ngai. Ồng Y Kơn yal: “Añ gŏ geh uă ngan bơta ƀuơn, bè lài do den priă đèng he pal lòt tong, mơya tŭ do kơnờm tam gơl sồ mờ gơtùi nggui tàm hìu ngui điện thoại ngac ngar. Bè hơ̆ den ƀuơn ngan, ờ huan roh tŭ jơ lòt rê, gơtùi tong priă khat tàm tŭ lơi, ờ duh pal lòt tus tàm xã. Tơmut app tàm điện thoại den tàng kung ƀuơn ngan”.

Ai gơ wèt mờ bi Y Blen Niê, Ƀí thư Ci đoàn ƀòn Ea Đun đơs, kơnờm geh kông nghệ sồ, broă lam lơh ală broă lơh, ală srơh đoàn halà yal đoàn viên ơruh pơnu tàm ƀòn in neh gơ gơs ƀuơn rlau, mhar rlau. Ală đoàn viên ơruh pơnu kung rơcang lài rlau tàm broă dờp jơnau tơnggit mờ hơ wơl mhar ngan. Geh tŭ, kơnòm kông nghệ sồ neh dong tềm pềr tŭ jơ, ƀuơn ngan tŭ geh ală tơngume jal mhar pal lam lơh mơ. Bi Y Blen Niê yal: “He lơh ală mpồl mờ nhắn tin tàm Zalo, messenger, Facebook mờ ngui ală mpồl do nàng nhắn tin yal ai đoàn viên ci đoàn ƀòn Ea Đun in bè tŭ jơ pơrjum. Sền gŏ gơ geh cồng nha ngan, geh tŭ he ơm dùl bă kung gơtùi lam lơh pơrjum pờ tơlik tàm internet ƀuơn ngan bơh Zalo, Facebook”.

Ƀòn Ea Đun tŭ do geh rlau 300 hìu bơnhă làng bol bal mờ mờr 1 rbô 500 nă cau gơ wèt 7 jơi bơtiàn kòn cau ơm kis bal, tàm hơ̆ jơi bơtiàn kòn cau dùl êt nă cau ơm kis bơh jŏ rlau nggùl. Jat ồng Nguyễn Khắc Hiệp, Ƀí thư Ci ƀộ mờ là kwang atbồ ƀòn Ea Đun pà git, kơnờm tam gơl chi tam geh cồng nha, priă lơh geh kờp bal dùl nă cau tàm nam pa do neh geh 55 tơlak đông dùl nă cau dùl nam. Uă ngan làng bol bơh 16 sơnam rlau hơđang ndrờm geh điện thoại ngac ngar geh tơrbŏ mạng 4G, ngui wifi.

Bơh nggùl nhai 12 nam 2022, ƀòn Ea Đun neh lam lơh broă lơh “Ƀòn làng bol ơm kis kông nghệ sồ”, lơh mpồl “kông nghệ sồ mpồl bơtiàn” mờ 5 nă cau tàm mpồl tờm ngan bơh cau atbồ ƀòn lơh kwang atbồ mpồl. Bơh tŭ tơlik mat, mpồl kông nghệ sồ mpồl bơtiàn neh jơh nùs lam lơh broă lơh mblàng yal bè ală ứng zụng kông nghệ sồ tus tơl nă cau, tơl hìu mờ tơngume tờm là broă lơh ngui broă drơng ala dà lơgar pờ tơlik tàm internet, ală ứng zụng tơm priă ờ duh pal ngui priă mat, phần mềm ƀảo hiểm y tế, ƀảm hiểm xã hội, broă lùp sền bơta niam nùs bơh làng bol dê gơ wèt mờ kwang bàng, công chức xã bơh ứng zụng Zalo, pơlam ngui internet niam… Mpồl dờp lơh oh mi mờ ƀòn kung pà dùl gói kướk wifi ờ sa priă ai làng bol in nàng pơn jờng làng bol git mờ ngui kông nghệ sồ, sơlơ ngui ală broă drơng ala pờ tơlik tàm internet.

Ồng Nguyễn Khắc Hiệp đơs là, mờ broă lơh bơh mpồl kông nghệ sồ mpồl bơtiàn dê là lòt tus tơl gùng, teh mpồng tơl hìu nàng mblàng yal bè tam gơl sồ, làng bol ƀòn Ea Đun geh rơhời tam gơl mờng kwèng mờ tơnguh khà ngui kông nghệ sồ: “Bơh ală dơ̆ pơrjum làng bol kung bè ală dơ̆ pơrlòng, pơrjum den mpồl kung tus tàm ƀòn, mblàng yal, hòi jà làng bol ngui kông nghệ sồ. Den do là jơnau kờñ lài ngan bơh Đảng dê mờ dơ̆ 2 là drơng bơta kuơ bơh tơl nă làng bol dê tàm broă lơh kung bè tàm ngui kông ngh sồ drơng ai rài kis làng bol dê in. Să tờm añ den ndrờm bè ngui internet uă ngan, yal tàm loa den mùng dùl bơnah lơm, yal tàm alăứng zụng mờ bol hi lơh pang Zalo mpồl kông nghệ mpồl bơtiàn ƀòn dê. Khat tŭ lơi làng bol mut tàm ală mã QR Code mpồl kông nghệ mpồl bơtiàn den ală jơnau tơnggit geh gơ rềng làng bol ndrờm git lơm”.

Mò Trần Thị Vân, Phó Củ tịc Ủy ƀan Ñân zân xã Ea Kênh, kơnhoàl Krông Păk pà git, lơh jat srơh tàm pơrlòng “Tam gơl sồ tơngai bơh nam 2022 tus nam 2025” bơh Ủy ƀan Ñân zân kơnhoàl Krông Păk lam lơh, xã hòi jà jơh gùt anih lơh broă cíñ trị bal mờ ală mpồl lơh broă, mpồl lơh sa kă bro mờ ală rơnàng làng bol lơh bal nàng bal mờ gp lơh gơ rề srơh tus jơh ală thôn, ƀòn, tổ zân phố. Bơh broă lơh lam lơh lài sơn rờp bơh Ủy ƀan Ñân zân kơnhoàl Krông Păk lơh tàm thôn Tân Đông, xã Ea Kênh, tus tŭ do, xã neh lam lơh tơrlòng lài tàm ƀòn Ea Đun, là ƀòn krơi is bal mờ uă ngan làng bol là cau jơi bơtiàn kòn cau dùl êt nă cau, bồ tơngoh bơsram sră làng bol ờ ndrờm bal. Bơh sơn rờp sền gŏ làng bol lơh jat uă ngan, ngui uă tam gơl sồ tàm broă lơh, tơm priă: “Tàm tơngai tus den nàng kờñ ngui niam gơnoar broă bơh Mpồl kông nghệ sồ mpồl bơtiàn dê den xã neh bơt bơtàu broă rơndap lơh 100%  thôn, ƀòn tàm xã geh tơlik mat ƀòn làng bol ơm kis kông nghệ sồ do, nàng tơl nă làng bol in git ală ứng zụng gơ rềng tus kông nghệ sồ bè tơm priă ờ duh pal ngui priă mat, tơm priă pờ tơlik tơn tàm internet gơ rềng tus ồs đèng, dia, hơ̆ sồng ală broă ndai”.

Bơh ală cồng nha bơh sơn rờp, broă lơh “Ƀòn làng bol ơm kis kông nghệ sồ” neh gơ rề tus uă thôn, ƀòn tàm kơnhoàl Krông Păk mờ rlau 250 mpồl kông nghệ sồ mpồl bơtiàn geh lơh, làm gùt ală thôn, ƀòn, tổ zân phố. Ală mpồl do geh bơta tus bal bơh uă ngan mpồl bè mpồl atbồ is, mpồl lơh broă mặt trận, cau tàm mpồl ală ci hội, mpồl cau, pơgru, kwang àng, ơruh pơnu… Bơh hơ̆ pơgồp bơnah ai tam gơl sồ mut ngan ngồn tàm rài kis bơh tiah ƀuơn tus tiah sar lơar ngài, tiah uă kal ke.