Gơl gùng do geh kuơ dờng màng ngan nàng kờñ bơtàu tơnguh lơh sa mpồl bơtiàn, sền gàr lơngăp lơngai, sền gàr dà lơgar tiah nhàr dà lơgar bơh càr dê. Rơndap broă lơh jòng 38 kơi sồ gơ wèt Rơndap broă lơh Dong kờl bơtàu tơnguh tiah nhàr dà lơgar Rơndap broă dềt càr Dăk Nông, bơnah broă lơh niam tàm tơrbŏ gùng ù gờl, geh priă tă lơh 426 tơmàn đông ai bơh priă càn Ngân hàng bơtàu tơnguh câu Á (ADB).

Rơndap broă lơh sơn đờm lơh tàm nhai 8 nam 2020, lòt gan ù tiah ală xã Nâm N’Jang, Dăk N’Drung (kơnhoàl Dăk Song) mờ Dăk Buk So, Quảng Trực (kơnhoàl Tuy Đức). Jat ồng Hà Sỹ Sơn- Phó Kwang atbồ Sở Giao thông Vận tải càr Dăk Nông yal, nàng drơng bơtàu tơnguh lơh sa mpồl bơtiàn ală tiah ƀòn lơgar, tiah nhàr dà lơgar, nam 2023 do, càr gam pơn jat tai bơcri rlau 700 tơmàn đông nàng lơh niam wơl, tàm tơrbŏ bal ală gơl gùng.