VOV4.K’ho- Ồs đèng Dăk Nông (PC Dăk Nông) pa lơh sir broă sền sơ wì, ai mŭt ngui broă lơh pờ đèng, drơng ai 360 hìu bơnhă làng bol ơm tàm thôn Dăk Lang, xã Quảng Khê, kơnhoàl Dăk Glong in.

Làng bol thôn Dăk Lang chờ hờp tŭ geh đèng ngui tàm rài kis mờ lơh broă sa

Geh đèng, muh mat ƀòn lơgar pa tàm thôn Dăk Lang, xã Quảng Khê, kơnhoàl Dăk Glong sơlơ niam tai

Do là ù tiah sar lơgar ngài, làng bol kis rah rài tơl mpồl làng bol ơm kis, rài kis gam uă ngan kal ke tài bơh ờ hềt geh đèng ngui tàm rài kis mờ broă lơh sa. Lơh geh bơta kơ̆p gơn sùm bơh làng bol dê, PC Dăk Nông neh bơcri priă lơh broă lơh jun gùng che đèng dà lơgar rê tus thôn Dăk Lang, tàm hơ̆ geh: lơh pa 4 trạm biến áp, mờr 2,5 kơi sồ gùng che đèng trung áp, 5,8 kơi sồ gùng che đèng hạ áp, kờp jơh priă bơcri rlau 3 tơmàn 500 tơlak đong. Tơngai mŭt lơh, làng bol tàm thôn neh ai ală bơta bè ai ù, dong kờl kông ñân sơntơ̆p jrong đèng, dŭi che đèng... nàng broă lơh mhar geh lơh sir.

Broă jun gùng che ồs đèng dà lơgar tus ală tiah làng bol kòn cau dùl ết nă cau, tiah sar lơgar ngài là bơta pơnđơl pràn lơh ngan bơh PC Dăk Nông dê mờ bơta pơgồp bal uă ngan bơh tiah do dê. Broă pờ đèng geh bơta kwơ dờng màng ngan tàm broă bơt bơtàu ƀòn lơgar pa, pơgồp bơnah dong làng bol bơtàu tơnguh lơh sa, tơrmù rƀah mờ bơtàu tơnguh rài kis làng bol dê.

Cau mblàng K’Hạnh