Pang sră bơh Tổng Ƀí thư ồng Nguyễn Phú Trọng geh cih gơs 600 pang, 111 nơm rùp lơh pơnyơu. Broă sền sơwì, lip gơs neh lơh jăt uă broă lơh mùl màl, sơrlèt git nđờ broă lơh nền nòn, di pal, khoa họk nàng Pang sră geh tơl niam jăt mờ jơnau kờñ bè bơta niam, tơngu me, broă lơh bal mờ tơngai geh ai. Ồng Nguyễn Túc, Kwang geh jơng tàm mpồl Củ tịc ủy ƀan Mặt trận Dà lơgar Việt Nam đơs là, pang sră cih gơs ai geh bơta pràn dờng màng bè jơnau git wă tàm gùt làng bol. Bơh tŭ hơ̆, lơh jăt dơ̆ tam dră mờ sa kwề sa koà ờ niam tàm tơngai pa, mờ tàm hơ̆ gùt làng bol tus bal nàng lơh jăt gơtùi jơnau kờñ “bañ lời”, “ờ khin”, “ờ kờñ”, “ờ lơh” sa kwề sa koà. Ồng Nguyễn Túc đơs: “Sa kwề sa koà ờ sŭk, lơh làng bol he ờ ring bal ngan, bè Tổng Ƀí thư neh đơs, tam dră sơndră, tam dră sa kwề sa koà neh gơs broă lơh ờ gơtùi sơlơ̆u wơl tŭ gùt làng bol neh tus bal. Den tàng broă lip gơs pang sră do, hơ̆ là dùl bơta nàng tơnguh uă rơlao tai jơnau git wă bơh gùt đảng, gùt làng bol, gùt ling klàng he dê bè broă tam dră mờ cau sò tơm tàm dơlam dà lơgar, akhar lơh ngan mờ lơh sùm lơh nùs nhơm añ  git wă ngan”.

Pa do, Đảng ủy Gah ală anih lơh broă Dà lơgar bơyai lơh Pơrjum kơlôi sơnơng, bơsram, pơlam lơh jat mờ mblàng yal tơngume pang sră “Kràñ cê, kơ̆ dơn rơcang sơndră sa kuề sa kuà, broă ờ niam, pơgồp bơnah bơt bơtàu Đảng mờ Dà lơgar he ngai sơlơ sàng goh, kơ̆ kơljap, pràn kơldang” bơh Tổng Ƀí thư ồng Nguyễn Phú Trọng dê. Đơs pơn dut pơrjum, Ƀí thư Ðảng ủy Gah ală anih lơh broă Dà lơgar ồng Nguyễn Văn Thể sồr, tơnơ̆ pơrjum do, ală kâp ủy, mpồl lơh broă Đảng tơrgùm đơng lam, sồr lơh niam dơ̆ pơrjum cíñ trị mìng tơngume bè jơnau cih pang sră bơh Tổng Ƀí thư ồng Nguyễn Phú Trọng dê tàm anih lơh broă, mpồl lơh broă. Bơh hơ̆ sền sơ wì bơta gơ rềng, ngui tàm ngan ngồn broă lơh bơt bơtàu, lơh niam wơl Đảng, rơcang sơndră sa kuề sa kuà, bơta ờ niam bơh anih lơh broă, mpồl lơh broă dê tàm tơngai tus: “Jơh gùt Đảng ƀộ Gah do pal bơsram nền nòn bè pang sră bơh Tổng Ƀí thư dê. Bơh hơ̆, tơl nă kwang bàng, đảng viên pal lơh jat gơ in di. Do là broă ờ gơtùi ơm, den tàng, jơh ală kwang bàng đảng viên, cau lơh broă tàm jơh gùt Đảng ƀộ Gah do pơn jat tai pơlam lơh jat nàng bol he ai jơh bồ tơngoh sồr lơh bơh Tổng Ƀí thư dê tàm pang sră geh lơh jat ngan ngồn tàm rài kis mờ pơgồp bơnah bơt bơtàu Đảng, bơt bơtàu Dà lơgar ngai sơlơ sàng goh, kơ̆ kơljap, pràn kơldang”.

Tàm broă lơh ngai Sră mờ bơta Niam chài sền sră Việt Nam nam 2023, tàm ƀòn dờng Hồ Chí Minh pa geh bơyai lơh cri bơyai, tìp bal mờ yal pang sră cih “Lơh ngan, lơh geh sùm broă tam dră, sơndră mờ sa kwề sa koà, ờ niam pơgồp bal tàm broă bơ̆t bơtàu Đảng mờ Dà lơgar he ngai sơlơ kloh niam, pràn kơl dang” bơh Tổng Ƀí thư ồng Nguyễn Phú Trọng dê. Ală kwang bàng mờ cau jăk chài neh đơs, pang sră ai tơngŏ bơta pràn kơl dang nùs nhơm: nàng dơ̆ tam dră mờ sa kwề sa koà, ờ niam lơh geh cồng nha uă ngan, lài jơh pal gàr niam gơnoar đơng lam bơh Đảng – do là broă geh bơta lơh jăt kơrnoăt, là bơta tờm gàr niam broă tơnguh bơtàu di pal dà lơgar dê. PGS.TS ồng Vũ Tình, Phó Kwang atbồ hìu bơsram Đại họk Khoa họk Xã hội và Ñân văn lài do (Đại họk Dà lơgar ƀòn dờng Hồ Chí Minh) đơs là: “Rơnàng kơnòm să pal git să tờm pal geh bơtơl bơta pràn, bơta pràn sơndră bơh să tờm bè lơi tàm tŭ ală mpồl cau pơrlơ̆ dră gam jòi tơl bơta nàng lơh aniai broă sơndră mờ sa kwề sa koà mờ ờ niam. Bơh pang sră do, rơnàng kơnòm să geh git loh làng rơlao kơnòl bơh să tờm gơwèt mờ dà lơgar, gơwèt mờ jơi bơtiàn, pal bơsram tàp, bơtơl bơta pràn bè lơi nàng di pal là ală cau gam mờ geh lơh tờm rơnàng tơnơ̆ do dà lơgar dê”.

Tơngai lài, ală càr tàm tiah Tây Nguyên kung neh bơyai lơh pơrjum mblàng wơl ală tơngume kuơmàng bơh pang sră “Kràñ cê, kơ̆ dơn rơcang sơndră sa kuề sa kuà, broă ờ niam, pơgồp bơnah bơt bơtàu Đảng mờ Dà lơgar he ngai sơlơ sàng goh, kơ̆ kơljap, pràn kơldang” bơh Tổng Ƀí thư ồng Nguyễn Phú Trọng dê. Ƀan Thường vụ Tỉñ ủy Kon Tum bơyai lơh pơrjum tơn mờ pờ tơlik tàm internet mờ 12 anih tàm tơrbŏ pờ tơlik tàm internet tàm càr pơlam lơh jat mìng tơngume bơsram mờ lơh jat bồ tơngoh, nùs nhơm, rài kis Hồ Chí Minh nam 2023 mờ pơrjum cíñ trị, bồ tơngoh bè pang sră bơh Tổng Ƀí thư ồng Nguyễn Phú Trọng dê. Đơs tàm pơrjum, ồng Dương Văn Trang, Ủy viên Đảng dà lơgar, Ƀí thư Tỉñ ủy, Củ tịc Hội đồng Ñân zân càr Kon Tum đơs nền: “Ală tơngume pơlam lơh jat tàm Pơrjum dơ̆ do kuơmàng ngan, dong mpồl kwang bàng, đảng viên git wă tơl làm bè tơngume kuơmàng bơh tơngume nam 2023 bơh càr dê mờ tơngume tờm tàm pang sră bơh Tổng Ƀí thư ồng Nguyễn Phú Trọng dê. Bơh hơ̆ tơnguh nùs nhơm geh kơnòl bơh ală kâp ủy, mpồl lơh broă Đảng mờ kwang bàng, đảng viên dê tàm broă jơh nùs rơcang sơndră sa kuề sa kuà, broă ờ niam; jơh nùs tàm broă lơh, bơsram sră nàng pơgồp bơnah bơt bơtàu càr Kon Tum bơtàu tơnguh mhar mờ kơ̆ kơljap”.

Ồng Y Búk Niê, 71 sơnam, kis tàm xã Ea Hđing, kơnhoàl Cư̆ Mgar là kwang bàng kăc màng lài do. Sền dà lơgar gơguh tơnơ̆ mờr 50 nam tơrgùm bal, ồng gơboh gơbài tài tŭ do rài kis bơh làng bol ngai sơlơ gơguh, dà lơgar pas gơs pràn kơl dang. Mơya, pa do, gơlik geh bơta sa kwề sa koà, ai geh nùs nhơm ờ niam tàm mpồl bơtiàn. Ƀộ Cíñ trị, Đảng Dà lơgar mờ tàm hơ̆ uă ngan là Tổng Ƀí thư ồng Nguyễn Phú Trọng neh đơng lam pràn ngan broă sơndră, tam dră mờ sa kwề sa koà kung bè broă lơh niam wơl đảng. Ồng Y Búk Niê dan mờ kwang đơng lam Đảng mờ Dà lơgar pal geh sùm broă lơh pràn tàm broă tam dră, sơndră mờ sa kwề sa koà. “Añ gŏ dà lơgar ngai sơlơ gơguh, rài kis làng bol ngai rơhời hờm ram, gơboh gơbài. Mơya, pa do, anih lơh broă geh gơnoar pơn jăt sùm gŏală dơ̆ sa kwề sa koà, geh pơnrơ ngan bè dơ̆ sa kwề sa koà Việt Á, Dơ̆ par dong klàs... Kwang đơng lam Đảng, Dà lơgar neh đơng lam lơh glài uă kwang bàng, cau dùl nă să gơtìp tìs, neh geh bàr Phó Thủ tướng gam at gơnoar broă pal tơn jơh lơh broă... Añ kơ̆p kờñ Tổng Ƀí thư ồng Nguyễn Phú Trọng geh pơn jăt tai đơng lam gùt Đảng, gùt làng bol geh lơh ngan sơndră mờ sa kwề sa koà, geh bè hơ̆, hơ̆ sồng dà lơgar geh niam, hơ̆ sồng gơtùi bơ̆t bơtàu dà lơgar pas gơs, pràn kơl dang, gơguh jăk...”.