VOV4.K’ho- Di Linh là kơnhoàl geh uă ngan làng bol ơm kis là cau K’ho bơh càr Lâm Đồng dê. Tơngai lài, bơdìh mờ broă lơh bơ̆t bơtàu Đảng, bơ̆t bơtàu ală anih lơh broă cíñ trị, broă bơtàu tơnguh đảng viên tàm tiah jơi bơtiàn kòn cau dùl êt nă cau sùm geh Đảng ƀộ kơnhoàl Di Linh jơh nùs lơh pràn lam lơh jăt. Bal mờ hơ̆, kơnờm lơh niam gơnoar broă lam lài, lơh krơh bơh đảng viên cau kòn cau dùl êt nă cau dê tàm bơtàu tơnguh lơh sa mờ rài kis, uă ƀòn lơgar neh geh bơta tam lơh loh làng ngan, sơrlèt gan kal ke, brồ guh bơ̆t bơtàu rài kis hờm ram, lơngăp lơngai chờ hờp.

Bơh ngai geh mŭt Đảng, đảng viên K’Hiệu là Kwang ătbồ thôn 2, xã Đinh Trang Thượng, kơnhoàl Di Linh, càr Lâm Đồng sùm gơ gơs là cau lam lài tàm broă lơh jăt ală srơh tàm ƀòn lơgar dê hòi jà lam lơh. Tàm hơ̆ geh sră tam gơl rơndăp tăp sèng chi tam neh lơh gơlik geh bơta pràn lơh gơrề uă ngan, dong làng bol tàm ƀòn đòm jăt lơh bal, tơnguh uă geh cồng nha lơh sa hìu bơnhă. Bơh 8 nam rê hờ lài, tơnơ̆ tŭ lòt bơsram ơdŭ bơto pơlam bè tam pa wơl kơphê, K’Hiệu neh khin cha koh sang jơh ală tờm kơphê kra jŏ sơnam gơ ai cồng nha dùl êt mờ tam ala tàm hơ̆ là sơntìl kơphê pa gơ ai cồng nha uă ngan. Tơnơ̆ 3 nam tam gơl jăt broă lơh dơ̆ dùl êt, sươn kơphê bơh hìu bơnhă K’Hiệu dê neh gơguh cồng nha lơh sa loh làng ngan. Bơh hơ̆, làng bol tàm ƀòn lùp bơsram mờ đòm jăt lơh bal. K’Hiệu pà gĭt, kờñ làng bol dòn, iăt jăt den lài jơh să tờm he pal lơh krơh lài, bơr đơs tê lơh. K’Hiệu đơs: Mờ gơnoar broă là đảng viên, là kwang bàng thôn dê, añ lơh ngan lơh jăt niam gơnoar broă bơh he dê tàm broă hòi jà làng bol bơtàu tơnguh lơh sa, sền gàr kơphê, đòm jăt bơta jak chài pa tàm broă sơngka sền gàr, tam chi tam. Bal mờ hơ̆, he pal hòi jà làng bol pin dờn tàm gùng dà đơng lam bơh Đảng dê, gùng dà broă lơh kơrnoăt boh lam bơh Dà lơgar dê, hòi jà oh kòn kòn sau lòt bơsram mờ ală srơh tàm pơrlòng bơh ƀòn lơgar dê hòi jà lam lơh.

Bơh broă sền gròi broă lơh bơ̆t bơtàu đảng, bơ̆t bơtàu ală anih lơh broă cíñ trị pràn kơldang kơ̆ kơl jăp, Đảng ƀộ xã Đinh Trang Thượng neh bơtàu tơnguh geh 64 nă đảng viên, uă ngan đảng viên là cau kòn cau dùl êt nă cau, pơrjum tàm 7 ci ƀộ. Jăt đảng viên kơnòm să là bi K’Vinh ơm tàm thôn 5, xã Đinh Trang Thượng, kơnhoàl Di Linh đơs, đảng viên là pal lơh krơh tàm broă lơh jăt ală gùng dà broă lơh, jơnau sồr bơh Đảng dê mờ kơrnoăt boh lam bơh Dà lơgar dê. Den tàng bè hơ̆, K’Vinh sùm lùp bơsram, bơsram tàp, jòi bơsram tai ală bơta gĭt wă geh kwơ nàng bơto yal wơl mờ làng bol ƀòn lơgar in. Bơdìh mờ tus bal bơtàu tơnguh srơh đoàn  tàm kơnă hơđơm, să tờm K’Vinh sùm bal mờ ală đảng viên tàm ci ƀộ tus bal jơh nùs ngan hòi jà làng bol tơnguh tai broă lơh broă sa, tàm dong kờl bal bơtàu tơnguh lơh sa hìu bơnhă, tàm ồp tê, chi sơntìl, pà ù lơh gùng lòt, bơ̆t bơtàu ƀòn lơgar pa...Jăt K’Vinh yal, mìng geh bơta dùl nùs bal, tơrgùm bal pràn bơh jơh gùt ƀòn lơgar dê den hơ̆ sồng bơta jơgloh bơta rƀah mhar geh tơrmù mờ rài kis den hơ̆ sồng rơhời tam gơl, brồ guh rài kis pa hờm ram. Bi K’Vinh đơs: Là dùl nă đảng viên den he pal kis jăt ală adat bơhiàn bơh Đảng dê sồr. Jơh nùs lùp bơsram ală kơrnoăt bơh Dà lơgar dê, bơh càr, bơh kơnhoàl dê nàng tơnguh uă bơta gĭt wă cíñ trị. Bal mờ hơ̆, pal geh nùs nhơm tam dră tàm broă sền gàr gùng dà, jơnau sồr bơh Đảng dê, kơrnoăt boh lam bơh Dà lơgar dê. Kwơmàng là să tờm he tơn pal sùm lơh krơh lam lài tàm rài kis, lơh krơh niam lam lài tàm broă ơm kis lơh lòt mờ làng bol ƀòn lơgar mờ jơh tơl nă cau gùt dar. 

Ờ mìng geh kwang bàng đảng viên tàm thôn, ƀòn lơm mờ geh bal ală đảng viên là kwang bàng đơng lam bồ Ủy ƀan Ñân zân ală xã, thị trấn bơh kơnhoàl Di Linh dê kung lơh jăt niam gơnoar broă lam lài, lơh krơh bơh ală broă lơh loh làng mờ geh kwơ ngan. Pơnrơ là đảng viên K’Ly, Phó Củ tịc Ủy ƀan Ñân zân xã Tân Thượng, kơnhoàl Di Linh. Gŏ broă lơh tam tờm ƀang tây cèng wơl priă jền lơh geh sùm, dipal mờ bơhiàn mờng kwèng lơh sa bơh làng bol tàm xã dê, K’Ly neh sơnđờm tam tơrlòng lài mờ lơh geh cồng nha tơnơ̆ hơ̆ den jà làng bol lơh jăt bal. K’Ly pà gĭt, kờñ tam gơl bồ tơngoh lơh sa bơh làng bol dê den pal tơngŏ bơh broă lơh geh kwơ ngan, neh là kwang bàng đảng viên den sơlơ pal lam lài lơh krơh lài tàm jơh ală broă. Bi K’Ly đơs: Tŭ do, xã Tân Thượng neh lơh geh tơl jơnau sồr dà lơgar dê bè bơ̆t bơtàu ƀòn lơgar pa. Nàng dipal là xã ƀòn lơgar pa, broă tơnguh uă priă lơh geh, tơn jơh jơgloh tơrmù rƀah là kwơmàng ngan. Den tàng bè hơ̆, nàng lơh sa bơh làng bol dê bơtàu tơnguh sùm, kơ̆ kơl jăp jŏ jòng, bơdìh mờ chi tam là kơphê, xã hòi jà làng bol tam tàm bơrlŭ bal, tam gơl bă ù tam phan neh kra jŏ sơnam nàng tam ală tờm chi sa plai geh priă jền lơh sa uă bè ƀơ, sầu riêng, macca...Mờ nàng làng bol geh priă lơh geh pah ngai, să tờm añ neh lam lài tàm broă tam tờm ƀang tây nàng làng bol in bơsram mờ lơh jăt. Tŭ do, tờm ƀang tây geh sùm drà blơi, giă tăc bơh 70 rbô tus 100 rbô đông dùl kĭ, uă cau kă phan lòt dan blơi tơn tàm sươn mơya ờ geh phan nàng tăc. Tơngai tus, añ geh lơh ngan rề ơnàng lơh uă broă do nàng uă làng bol geh priă jền pah ngai, gàr niam kơ̆ kơl jăp rài kis.

Tŭ do, jơh gùt kơnhoàl Di Linh geh rlau 4 rbô 360 nă đảng viên, tàm hơ̆ geh 868 đảng viên là cau jơi bơtiàn kòn cau dùl êt nă cau. Tàm tơngai do, bal mờ ală đảng viên tàm 2 xã Đinh Trang Thượng mờ Tân Thượng, ală đảng viên cau jơi bơtiàn kòn cau tàm ală xã Sơn Điền, Gia Bắc, Đinh Lạc bơh kơnhoàl Di Linh dê sùm lơh niam gơnoar broă he dê. Ngan mpồl đảng viên do neh gơ gơs là ală mpồl cau lam lài lơh krơh, sùm lam lơh lài tàm jơh ală broă, tă pơgồp uă ngan tàm broă lơh bơtàu tơnguh lơh sa- mpồl bơtiàn bal bơh ƀòn lơgar kơh bơnơm Di Linh do dê.

Cau cih Quang Sáng- Cau mblàng Lơ Mu K’Yến