Tềng bơnah broă lơh gơl gùng sồ III tàm xã Cư̆ Elang, kơnhoàl Ea Kar, càr Dăk Lăk sùm geh git nđờ rơhiang nă kwang bàng, cau lơh broă mờ rơlao 60 nơm rơndeh pơn diang ù, lŭ geh tam pà lơh broă 3 dơ̆, lơh broă ngai kung bè mang. Ală broă mìng geh lơh tàm tơngai do là bơnàng ñjrong rơbàng, bơnàng gùng, tiah jăt gah gùng…

Ồng Trần Hữu Quốc, Kwang atbồ đơng lam rơndăp broă lơh do pà git, tus tŭ do gơl gùng do kung gam gơtìp ờ uă bơta kal ke ờ hềt geh bơsong jơh, tàm hơ̆ geh broă tam gơl ù brê, tơm ntrờn ù tiah, mơya mpồl lơh broă gam lơh ngan lơh mhar broă lơh, geh bă ù tus tàm tiah lơi, mhar lơh tus tàm tiah hơ̆. Tàm gơl gùng sồ II geh Ƀộ Giao thông Vận tải lơh tờm bơcri priă tàm xã Cư̆ Drăm, kơnhoàl Krông Bông, ală mpồl lơh broă kung neh ai măi mok, cau lơh broă mhar lơh ală broă tàm gơl gùng do.