Do là jơnau yal tàm Pơrjum cau yal jơnau nhai 07 nam 2023 bơh Mpồl Mblàng yal gùng dà broă lơh Đảng Dà lơgar dê bơyai lơh drim ngai 12/07 tàm Hà Nội.

Thứ trưởng Ƀộ Kế hoạc mờ Đầu tư ồng Đỗ Thành Trung pà gĭt, GDP 6 nhai bồ nam 2023 gơguh 3,72%, lơyah khà dơ̆ 2 tàm ală tŭ tơngai bơh nam 2011- 2023. Bulah bè hơ̆, tềng đăp bơta dunia gam uă kal ke, lơh sa lơgar he dê pà gŏ ală tềl sơñio niam ngan, roh giă priă geh gròi sền tàm khà dipal. Ai priă bơcri bơh kes priă dà lơgar dê pơn jăt tai geh tơrgùm lơh pràn, lơh gơlik bơta gơn kơnờm ai gơguh lơh sa in...Bulah bè hơ̆, broă lơh tăc mờ blơi phan mờ lơgar ndai kung gam pal kong sơl mờ uă bơta kal ke tài bơh uă dà lơgar lơh jăt gùng dà broă lơh sền gròi kràñ priă jền tơm lơh gơmù jơnau kờñ ngui sa...Bè broă rơndăp lơh ai 6 nhai lồi nam do in, là pal lam lơh mhar geh cồng nha rlau tai ală broă lơh, nàng lơh pràn kơldang mờ lơh pràn bơtàu tơnguh wơl rài lơh sa.

Kung tàm pơrjum sơl, ală kwang bàng iăt Mpồl Lơh broă mờ lơgar ndai Dà lơgar dê yal mìng tơngume “Broă dunia tiah do, gĭt gơ̆p lơh broă mờ lơgar ndai bơh lơgar Việt Nam dê tàm 06 nhai do mờ yal lài broă gơlik geh tàm 6 nhai lồi nam”.