VOV4.K’ho- Drim ngai 20/7, tàm càr Vĩnh Phúc, Mpồl duh broă lý luận dà lơgar mut pơrjum dơ̆ 4, tơngai lơh broă bơh nam 2021 tus nam 2026. Ồng Nguyễn Xuân Thắng, Ủy viên Ƀộ Cíñ trị, Củ tịc Mpồl duh broă lý luận dà lơgar, Kwang atbồ Họk viện Cíñ trị dà lơgar Hồ Chí Minh neh đơng lam pơrjum.

Pơrjum neh cribơyai, tă pơgồp jơnau đơs tàm 3 jơnau rơcang cih jơnau yal pơlam broă bơh Mpồl duh broă dê, pơgồp bơnah drơng rơcang pơrjum Đảng dà lơgar dơ̆ 6 khóa 13 kờp dŭ geh lơh tàm nhai 10 tus do, geh: 2, 3 broă tàm sră pơ àr mờ tàm ngan ngồn bơh 15 nam lơh jat Nghị quyết Đảng dà lơgar dơ̆ 5 khóa 10 bè pơn jat tai tam gơl broă lơh đơng lam bồ bơh Đảng dê gơ wèt tus mờ broă lơh bơh ală anih lơh broă cíñ trị dê; 2, 3 broă tàm sră pơ àr mờ tàm ngan ngồn bè bơt bơtàu mờ lơh sir dà lơgar gơnoar adat boh lam Xã hội củ nghĩa Việt Nam tus nam 2030, gùng dà ai tơlik lài tus nam 2045; 2, 3 broă tàm sră pơ àr mờ tàm ngan ngồn bè gùng dà, broă lơh lơh sa mờ măi mok, tam gơl pa dà lơgar tus nam 2030, broă wèt sền tus nam 2045.

Ồng Nguyễn Xuân Thắng sồr ală kwang bàng, ală cau jak chài tơrgùm cribơyai, tă pơgồp jơnau đơs tàm ală jơnau rơcang cih mờ nùs nhơm geh kơnòl uă, ai hơ̆ lơh bơnàng jă kuơmàng nàng lơh sir 3 jơnau yal yal Ƀộ Cíñ trị, Ƀan Ƀí thư in,  di tŭ drơng Pơrjum Đảng dà lơgar dơ̆ 6 khóa 13.

Cau mblàng K’Duẩn