VOV4.K’ho- Drim ngai 25/01, tàm hìu lơh broă Cíñ phủ, Ƀí thư Đảng dà lơgar, Phó Thủ tướng ồng Lê Minh Khái neh đơng lam pơrjum mờ ală ƀộ, gah broă lơh, ai jơnau đơs lơh sir jơnau rơcang cih nghị quyết bơh Cíñ phủ dê bè broă lơh bơtàu tơnguh wơl, bơtàu tơnguh lơh sa mpồl bơtiàn. Đơs pơn dut pơrjum, Phó Thủ tướng ồng Lê Minh Khái sồr Ƀộ Kế hoạc mờ Đầu tư cih dờp jơnau đơs bơh ală ƀộ, gah broă lơh, lơh sir jơnau rơcang cih nghị quyết, kờp sền ală cau geh sră dong kờl bơh dà lơgar, kơlôi sơnơng broă bơ tơl cau dong kờl gơ in dipal.

Phó Thủ tướng tơngkah, broă lam lơh, ală broă lơh pal gơtùi lam lơh ngan ngồn, di mờ bơta geh ngan, lơh jat jơnau pơn dut bơh Ƀộ Cíñ trị mờ Nghị quyết bơh Quôk hội dê, tài do là broă lơh dờng mờ kờp jơh priă tă lơh mờr 350 rbô tơmàn đông, uă kơnòl broă pal pơgồp bal ngac ngar mờ broă rơndap lơh bơcri priă dà lơgar di mơ tơngai. Nghị quyết pal cih loh làng, broă lam lơh broă dong kờl pal gàr ờ lời gơlik geh broă lơh tìs.

Cau mblàng K’Duẩn