Yal tềng đăp Quôk hội, Phó Thủ tướng Cíñ phủ ồng Lê Minh Khái pà gĭt ală nhai bồ nam 2024, lơh sa dờng sền bal geh gàr kơ̆, roh giă priă geh gròi sền. Gơguh lơh sa GDP quý I nam 2024 lơh geh 5,66%, uă ngan rlau jơh tàm tơngai bơh nam 2020 – 2023. Kờp tus jơh nam 2023, neh lời geh pơgap 680 rơbô tơmàn đong nàng lam lơh broă lơh priă nhai pa.

Bè kơnòl broă mờ broă lơh tờm, Phó Thủ tướng neh đơs 11 mpồl kơnòl broă, broă lơh lam lơh tàm tơngai tus, tàm hơ̆, lài ngan sơlơ tơnguh gơguh lơh sa pơgồp bal mờ gàr kơ̆ lơh sa dờng; pơgồp bal niam, geh cồng nha, bơnĕ bơnài bal ală gùng dà broă lơh đơng lam lơh sa pa. Bal mờ hơ̆, pơn jat tai lơh sir mpồl kwang bàng lơh sră nggal Dà lơgar dê sàng goh, niam, gơtùi lơh broă, geh cồng nha; tam gơl pa atbồ lơh kơnòl broă Dà lơgar, kông cứk, bơt bơtàu mpồl kwang bàng, kông cứk geh tơl nùs nhơm niam, bơta pràn jak, song dơ pă, ngan ngồn là cau dĭ bơh làng bol dê; lam lơh broă lơh priă nhai pa bơh ngai 01/07/2024.