Tàm hơ đơm mƀur tờm chi kềng gah gùng rơndeh 14, tềng bồ đap mpồng hìu bơsram kâp 3 Quang Trung, xã Dăk Rla, kơnhoàl Dăk Mil, càr Dăk Nông, ală cau ling kwang àng gam sền sơwì broă lơh jat gàr niam lơngăp lơngai lòt rê tàm gùng gơwèt mờ ală kơnòm bơsram măi rơndeh măi. Tàm do, bal mờ broă sền sơwì, kwang àng kung pơlam, tơngkah ală oh lơh jat adat gùng lòt ù gờl. Oh Nguyễn Anh Trung, kơnòm bơsram ơdŭ 12A6 đơs: “Ală wa kwang àng sùm lòt sền nàng pleh ală broă lơh tìs là niam ngan. Ală wa sền sơwì rơndeh rơndồ, git gŏ mờ lơh glài di tŭ ală broă lơh tìs”.

Lài mờ tŭ sền sơwì, mpồl kwang àng neh tus Hìu bơsram kâp 3 Quang Trung bơyai lơh mblàng yal, phàt sră cih jơnau tơnggit yal ală jơnau cih bơh adat boh lam dê bè rơndap tap sèng lơngăp lơngai lòt rê tàm gùng. Kwang àng kung pơgồp bal mờ hìu bơsram kờp sền, sền sơwì bơta geh ngan tàm hìu ơn rơndeh bơh hìu bơsram dê mờ ală anih ơn rơndeh gùt dar hìu bơsram, mblàng yal, tơngkah kơnòm bơsram bañ đì rơndeh măi rlau 50 phơng khối tŭ ờ hềt tơl sơnam jat jơnau sồr. Tơnơ̆ tŭ kĭ jơnau hơ pơrgon lơh jat di Adat gùng lòt ù gờl, oh Trần Thị Thu Thanh, kơnòm bơsram ơdŭ 12A1 pà git: “Sau gŏ gơ lơh ngan ngồn mờ geh kuơ ngan tŭ dong bol sau geh tai uă jơnau git wă bè jơnau cih sồr gàr niam lơngăp lơngai lòt rê tàm gùng; mờ bơh hơ̆ den gơtùi rơcang lài pleh ală broă lơh tìs ƀuơn gơbàn tŭ lòt rê tàm gùng”.

Klau pơgru Nguyễn Văn Ngọc, Kwang atbồ Hìu bơsram kâp 3 Quang Trung pà git, hìu bơsram tàm gùng rơndeh 14, tiah geh khà rơndeh rơndồ lòt rê uă den tàng jơnau pơhìn gơlik geh rềs àr gùng lòt là uă ngan. Hìu bơsram pơgồp bal mờ ală mpồl lơh broă geh gơnoar sùm mblàng yal nàng kơnòm bơsram in git lơh jat nền nòn ală jơnau sồr tŭ lòt rê tàm gùng: “Lài ngan là hìu bơsram neh ai ală oh kĭ jơnau hơ pơrgon, dơ̆ 2 là sùm jat sền broă lơh jat di mờ jơnau sồr; mờ kung sùm tơngkah ală oh tàm ală dơ̆ pơrjum pah poh. Pah nam den hìu bơsram pơgồp bal mờ gah kwang àng lam lơh dơ̆ bơsram bơdìh mờ tŭ jơ bơsam tàm ơdŭ nàng ală oh in jòi git bè adat gùng lòt ù gờl nàng gàr niam lòt rê tàm gùng dồ bă lơngăp lơngai”.

Tơngai lài, mpồl kảñ sát gùng lòt càr Dăk Nông neh sùm sơlơ tơnguh tai broă lơh mblàng yal, bơto bơtê adat boh lam bè gùng lòt tus kơnòm bơsram ală hìu bơsram tàm càr. Thượng tá  ồng Phạm Quốc Lập, Kwang atbồ Cơldŭ Kảñ sát gùng lòt – Kwang àng càr Dăk Nông pà git, bal mờ broă sùm lòt sền, sền gròi, lơh glài kràñ ală cau lơh tìs, mpồl kung git nền broă lơh mblàng yal tơnguh jơnau git wă lơh jat adat boh lam kung gam là broă lơh khà dùl nàng gàr niam lơngăp lơngai lòt rê tàm gùng gơ rềng tus kơnòm bơsram: “Mpồl kảñ sát gùng lòt rơcang lài pơgồp bal mờ Mpồl lơngăp lơngai lòt rê tàm gùng càr sơlơ tơnguh tai mblàng yal tàm ală hìu bơsram, tềng đap mat là tàm ală tiah kuơmàng jat kềng gah gùng Hồ Chí Minh, gùng dờng 28 mờ tiah tờm ală kơnhoàl, ƀòn dờng bơh càr Dăk Nông dê. Dơ̆ 2 là rơcang lài pơgồp bal mờ ală anih lơh broă, mpồl, gah broă lơh mblàng yal tus mè bèp kơnòm bơsram bañ pà rơndeh oh kòn he in tŭ ờ hềt tơl sơnam măi rơndeh. Bal mờ hơ̆ den lam lơh broă lơh mblàng yal tus ală tiah sar lơgar ngài mờ gàr niam lơh gơtùi ală broă lơh mpồng hìu bơsram lơngăp lơngai lòt rê tàm gùng tàm càr”.