Lơh jat jơnau đơs pơndŭt bơh Phó Thủ tướng Cíñ phủ ồng Trần Lưu Quang dê tàm pơrjum jơh gùt lơgar bè broă lơh rcang lài pleh mờ trồ tiah lơh aniai mờ jòi dong kờl cau gơtìp rềs àr nam 2024, càr Kon Tum gam mhar ngan lơh jat broă lòt sền uă broă rcang lài mờ mìu dà tih bơh ală tiah, mpồl lơh broă tàm ù tiah càr dê.

Jat hơ̆, Mpồl đơng lam rcang lài pleh mờ trồ tiah aniai, jòi dong kờl cau gơtìp rềs àr mờ rcang lài kơryan sền gàr làng bol càr Kon Tum sồr ală tiah, mpồl lơh broă lòt sền broă lơh bơt bơtàu tờm, ờ pràn geh bơta pơhìn gơtìp rềs àr tŭ trồ tiah lơh aniai uă, bè: dà kŏ dà cò, tơrlah ù, ngơr bam dà; lòt sền broă lơh bơt bơtàu broă rơndăp lơh, rcang lài mpồl cau lơh broă, măi mok phan bơna jat gùng dà broă lơh “4 tơn tàm dùl bă tiah” rcang lài pleh mờ ală bơta gơlik geh bơh trồ tiah lơh aniai bè mìu dờng, dà kŏ dà cò digơlan gơlik geh. Bal mờ broă lơh lòt sền uă broă lơh rcang lài pleh mờ trồ tiah lơh aniai mờ jòi dong kờl cau gơtìp rềs àr, gơnoar atbồ ală tiah tàm càr Kon Tum kung ai tơl kwang bàng, bơtơl mpồl cau lơh broă ai broă lơh rcang lài pleh mờ trồ tiah lơh aniai; rcang lài lơh gùng dà broă lơh ai ală bơta gơlik geh nàng lam lơh broă lơh lòt jòi dong kờl cau gơtìp rềs àr tàm ù tiah càr dê.