VOV4.K’ho - Nam 2021, càr Dăk lăk neh kơ̆ kơl jăp sơrlèt mờ dùl nam mờ uă bơta tơlòng, kal ke mờ lơh geh ală cồng nha kwơ màng, lơh geh bơta pràn ai nam 2022 mờ lơh jăt Nghị quyết pơrjum dờng Đảng ƀộ càr dơ̆ 17 tơngai bơh nam 2020 tus 2025. Hương Lý, cau ai tơngit jơnau đơs Việt Nam tàm Tây Nguyên geh dơ̆ lùp ồng Nguyễn Đình Trung, Kwang geh jơng tàm Đảng dà lơgar, Ƀí thư Tỉñ ủy Dăk Lăk bè ală cồng nha mờ Đảng ƀộ, gơnoar atbồ bal mờ làng bol ală kòn cau tàm càr Dăk Lăk neh lơh geh mờ lơh ngan pràn kơl dang lơh jăt “Jơnau kờñ dơ̆ lĕ bal” tàm ală nam pơn jăt tai.

Ơ ồng Nguyễn Đình Trung, Kwang geh jơng tàm Đảng dà lơgar, Ƀí thư Tỉñ ủy Dăk Lăk, nam 2021 neh tơn jơh, do kung là nam sơnrờp càr Dăk lăk lơh jăt Nghị quyết Pơrjum dờng Đảng ƀộ càr dơ̆ 17 mờ rơndăp broă lơh sa mpồl bơtiàn 5 nam bơh nam 2021 tus 2025. Ồng gơtùi pà git ờ uă cồng nha geh pơnrơ ngan mờ càr Dăk Lăk neh lơh geh tàm nam pa do?

Ồng Nguyễn Đình trung: “Nam 2021, tàm bơta gơtìp uă kal ke bơh kòp Kovid-19 mờ gơrềng bơh ờ uă bơta ndai tàm càr, Tỉñ ủy, Ƀan thường vụ tỉñ ủy neh tơrgùm đơng lam, lam sồr ală kấp ủy, gơnoar atbồ bal mờ làng bol tàm càr lơh jăt niam broă rơcang sơndră mờ kòp gơtờp mờ ală kơnòl tơnguh bơtàu lơh sa mpồl bơtiàn, broă bơ̆t bơtàu Đảng, broă bơ̆t bơtàu mpồl lơh broă cíñ trị mờ nùs nhơm “sơlơ gơtìp uă kal ke tơlòng den sơlơ pal tơnguh gơnoar tam klăc bal lơh ngan uă tàm broă lơh jăt ală kơnòl neh geh ai”. Cồng nha broă lơh bơh nam 2021, càr neh lơh geh uă cồng nha niam.

                                         Ồng Nguyễn Đình Trung, Ƀí thư Tỉñ ủy Dăk Lăk

Bè broă tơnguh bơtàu lơh sa mpồl bơtiàn den geh 15 tàm 16 khà broă neh lơh geh mờ sơrlèt mờ rơndăp broă neh geh ai. Tàm hơ̆, hòi jà priă bơcri gùt mpồl bơtiàn kờp dŭ geh di pơgăp rơlao 42 rơbô 100 tơmàn đong, geh 141% pơn drờm mờ rơndăp broă neh geh ai. Tă tàm kes priă dà lơgar geh rơlao 8 rơbô 200 tơmàn đong, geh 152% pơn drờm mờ kờp dŭ dà lơgar jào. Khà xã geh khà ƀòn lơgar pa sơrlèt mờ 2 xã pơn drờm mờ rơndăp broă neh geh ai. Tàm broă tơnguh bơtàu lơh sa càr dê, den tơnguh bơtàu năng lượng lơh geh wơl là dùl bơta niam tàm broă lơh sa mờ măi mŏk càr dê. Càr neh hòi jà bơcri priă geh 28 rơndăp broă lơh mờ kờp jơh khà priă bơcri dan cih măt rơlao 24 rơbô tơmàn đong. Uă rơndăp broă pa neh lơh broă, pơgồp bal tàm broă chồl pràn broă tơnguh bơtàu lơh sa mpồl bơtiàn càr dê. Nam 2021, broă bơ̆t bơtàu Đảng, broă bơ̆t bơtàu mpồl lơh broă cíñ trị kung neh sền gròi mờ lơh jăt ndrờm bal mờ geh uă cồng nha niam.

Ơi, bơdìh mờ ală cồng nha neh lơh geh bè tơnguh bơtàu lơh sa mpồl bơtiàn, broă bơ̆t bơtàu Đảng, bơ̆t bơtàu mpồl lơh broă cíñ trị kung neh càr Dăk Lăk sùm sền gròi mờ lơh jăt. Do geh sền là broă kal ke, pal geh bơyai lơh geh niam. Bè hơ̆, mŭt tàm nam dơ̆ 2 bơh broă lơh jăt Nghị quyết Pơrjum dờng Đảng dơ̆ 13 mờ Pơrjum đờng Đảng ƀộ càr dơ̆ 17, broă do geh pơn jăt tai geh chồl pràn lơh jăt bè lơi ơ ồng?

Ồng Nguyễn Đình Trung: Nghị quyết bơh Tỉñ ủy nam 2022 neh ai: “Pơn jăt tai chồl pràn broă bơ̆t bơtàu lơh niam Đảng jăt bơta Nghị quyết dà lơgar, khoă 12 mờ 13 pơgồp bal mờ broă lơh jăt cỉ thị sồ 05 mờ jơnau đơs pơn dŭt sồ 01, ngai 18 nhai 5 nam 2021 bơh Ƀộ Cíñ trị mờ ờ uă kơnòl tờm bè tơnơ̆ do:

Lài ngan, bơyai lơh jăt jơnau đơs pơn dŭt sồ 21, ngai 25 nhai 10 nam 2021 bơh ƀan cấp hàñ Đảng dà lơgar bè chồl pràn bơ̆t bơtàu lơh niam wơl Đảng mờ mpồl lơh broă cíñ trị. Lơh ngan kơrian, lơh glài nền nòn kwang bàng, cau geh đảng ờ niam bè bồ tơngoh cíñ trị, nùs nhơm, gùng dà, bơta tơngŏ lơh is mờ tam gơl is.

Dơ̆ bàr, bơ̆t botàu mpồl cau geh đảng geh tơl bơta pràn, nùs nhơm niam, bơngă pin dờn ndrờm bal mờ kơnòl. Tam gơl pa rơndăp săp sèng mpồl mpồl kwang bàng lơh broă geh cồng nha broă lơh bơh mpồl lơh broă cíñ trị pơgồp bal mờ tơmù biên cế. Bơ̆t bơtàu wơl mpồl kwang bàng, công chức, viên chức mờ bơ̆t bơtàu anih lơh broă.

Dơ̆ pe, tam gơl gùng dà broă lơh, tơnguh uă bơta pràn đơng lam, bơta pràn tam dră bơh mpồl đảng, cau geh đảng. Tàm hơ̆ geh tơnguh uă gơnoar lam lài, tơnguh gơnoar, kơnòl bơh cau geh đảng. Chồl pràn broă sền gròi, lơh jăt nền nòn broă lơh glài…

Dơ̆ poan, tơnguh uă cồng nha broă rơcang gŏ, lơh glài nền nòn cau sa kuề sa koà, kơrian rơhời cau sa kuề sa koà, hoàc huơr. Chồl mhar broă lùp khào, bơsong ală broă yal yă yal khài. Tàm hơ̆ uă ngan là broă sa kuề sa koà kal ke geh mpồl bơtiàn sền gròi.

Broă dŭt ndơl là, mặt trận dà lơgar Việt Nam mờ ală mpồl lơh broă cíñ trị mpồl bơtiàn pal rơcang tơnguh gơnoar sền gròi jơnau tus bal pơgồp tàm broă bơ̆t bơtàu Đảng, bơ̆t bơtàu gơnoar atbồ, bơ̆t bơtàu mpồl kwang bàng cau geh đảng tàm broă lơh jăt kơnòl geh jào.

Tàm bơta kòp Kovid-19 gơtìp kal ke, nàng gàr niam broă rơcang sơndră mờ kòp geh cồng nha mờ tơnguh bơtàu broă lơh sa mpồl bơtìan mờ lơh geh ală khà broă mờ Nghị quyết pơrjum dờng Đảng ală kấp neh geh ai, Thường trựk Tỉñ ủy, Ƀan Thường vụ tỉñ ủy Dăk Lăk neh geh ală gùng dà, đơng lam, lam sồr bè lơi tàm tơngai tus ơ ồng?

Ồng Nguyễn Đình Trung: Nam 2022, di gơlan bơta kòp pơn jăt tai gơtìp kal ke. Den tàng, Ƀan thường vụ tỉñ ủy neh tơlik cỉ thị sồ 16 bè broă đơng lam, lam sồr broă rơcang sơndră mờ kòp Kovid-19 tàm bơta pa nàng đơng lam tơl ală bơta mpồl lơh broă cíñ trị lơh jăt ală kơnòl rơcang sơndră mờ kòp gơtờp. Tàm hơ̆ geh ai ală kơnòl tờm tơnơ̆ do:

Dùl là rơcang lơh jăt bơta gơtìp bơh kòp nàng di tŭ geh jơnau đơng lam, bơto sồr ală broă lơh geh kuơ, di pal bañ lời gơtìp ờ thàn ni sơna, bañ lời gơtìp gar ir tus mpồl lơh broă gah lơh sơnơm tàm uă bơta.

Dơ̆ bàr là tơnguh broă đơng lam yal tơngit, lam sồr nàng tơnguh uă jơnau git wă bơh làng bol tàm broă rơcang sơndră mờ kòp Kovid-19.

Pe là tơrgùm đơng lam ală huyện ủy, thị ủy, thàñ ủy mờ đảng ùy gơwèt bal, ală anh lơh broă rơcang lài rơndăp broă, gùng dà broă lơh nàng gàr niam broă rơcang sơndră mờ kòp gơtờp. Tàm hơ̆ uă ngan là tàm dơ̆ kwơ màng, satềp Ñâm Zần.

Poan, pơn jăt tai lơh jăt nền nòn Nghị quyết sồ 128 bơh Cíñ phủ mờ rơndăp broă bơh Ƀộ Y tế kung bè Ủy ban tỉñ. Tàm hơ̆ đơs di, di tŭ ală kấp gơtìp kòp nàng ngui ală broă lơh di pal mờ bơta kòp gơtờp. Gàr niam broă lơh jăt broă rơcang sơndră mờ kòp mờ drơng tàm broă tơnguh bơtàu lơh sa mpồl bơtìan càr dê.

Dan ưn ngài ồng!

Cau mblàng Ndong Brawl