VOV4.K’ho- Tơngkah kir sơnrai 75 nam Ngai Cau ling sồt să- Cau ling chơ̆t màng, mang do 27/07 geh lơh Tàm tơrbŏ sơñio rùp mờ tơngume “Jơnau đơs crih jờng rơ bơta ring lơngai”. Broă lơh do bơh Ƀan Tuyên giáo dà lơgar drơng lơh, pơgồp bal mờ Ƀộ Lao động, Thương ƀiñ mờ Xã hội, Anih Sơñio rùp Việt Nam mờ Ủy ƀan Ñân zân ală càr, ƀòn dờng: Hà Nội, ƀòn dờng Hồ Chí Minh, Quảng Nam, Bình Định, Hà Giang mờ An Giang bơyai lơh. Mờ bơhiàn ờs mờng bơh yau “Hùc dà kah tô dà”, “Kis gĭt jơnau gĭt adat”, nhai 07 pah nam là tŭ nàng jơh gùt jơi bơtiàn kah rơngal bal, kah kơlôi wơl ală cau phi jơh mhàm ntìng he dê ai bơta ring lơngai tàm jơh ală ƀòn lơgar in.

Mờ 6 anih pờ tàm tơrbŏ bal, là: Hà Nội, ƀòn dờng Hồ Chí Minh, Quảng Nam, Bình Định, Hà Giang mờ An Giang, “Jơnau đơs crih jờng rơ bơta ring lơngai” là broă lơh krơi is ngan, cih wơl ală jơnau kah yau khin cha jak chài bơh jơi bơtiàn dê, ală cau neh ơm bĭc mờ phi să ai bơta kơ̆p kờñ ngan ring lơngai bơh cau Việt Nam dê in tàm jơh bơta jòng bơh tŭ tơngai kah yau jơi bơtiàn dê.

Cau mblàng Lơ Mu K’Yến