Kông ty TNHH MTV Tam sền gàr brê tiah đah jum Tây Nguyên gam atbồ 27 rbô 277 lồ brê tàm ù tiah bơh 3 xã Quảng Trực, Quảng Tâm mờ Dăk Ngo bơh kơnhoàl Tuy Đức dê. Gơ rềng tus brê mờ ù ơm tàm do, geh uă ngan kwang bàng, kwang đơng lam bồ gơnoar atbồ kâp xã, kâp kơnhoàl neh gơtìp lơh glài, tơlik bơdìh Đảng, geh tŭ geh cau gam gơtìp kup jàm. Rlau 3 rbô 320 lồ brê bơh Kông ty atbồ neh gơtìp sơ gràm, ngui tìs mờ adat boh lam. Nàng bơsong jơnau gơ lời wơl do dùl bă dipal là dùl bơta kal ke ngan. Tài mùl màl bơrlŭ bal tàm ală jơi bơtiàn dùl êt nă cau ơm kis bơh jŏ tàm ƀòn lơgar, jơi bơtiàn dùl êt nă cau bơh tiah đah tô dà lơgar ntrờn mut ơm kis mus kơl brê sơ gràm ù, geh uă cau neh lam lơh broă tac bro ù nàng sơ mờm jòi sa kuơ. Khi jòi tơl kai nàng ơm ing, geh tŭ là dră wơl kơrnuat ai wơl ù tam brê gơtìp sơ gràm phà. Ồng Nguyễn Văn Bình- Kwang atbồ Kông ty TNHH MTV Tam sền gàr brê tiah đah jum Tây Nguyên yal: “Kơrnuat boh lam, broă lơh bol he dê den gơ gam tàm rơndap rơndồl uă, gơ ờ hềt loh làng. Den tàng gam geh ală bơta ờ niam tàm hơ̆. Hơ̆ sồng làng bol den bè hơ̆, bồ tơngoh bơsram sră làng bol dê bè hơ̆, 2, 3 nă cau bơ chồt, den gơ dŏ bal dùl ròt ală broă gơlik geh tơnơ̆…”

Tàm bơnah brê bơh Kông ty đah jum Tây Nguyên dê neh đal git 365 hìu bơnhă làng bol sơ gràm 2 rbô 400 lồ nàng tam tờm chi jŏ nam mờ lơh hìu. Bơta krơi sơ ƀơi là tŭ do tàm do gam rlau 320 bă tiah, bal mờ mờr 1 rbô lồ là chi tam jŏ nam mơya ờ hềt git loh cau tờm là cau lơi. Bơh nam 2018 rê hờ ndol, kông ty neh lơh 12 rơndap broă lơh tam wơl, tam brê mờ broă lơh kĭ sră pơrgon mờ 263 hìu bơnhă, bal mờ bă ù 680 lồ. Bè hơ̆, mìng rlau 20% tàm khà kờp jơh 3 rbô 320 lồ ù gơtìp sơ gràm phà bơh kông ty do dê geh bơsong mờ broă kĭ lơh broă bal bơcri priă lơh sa suơn sre- brê bơnơm mờ jàu ơpah suơn chi. Đơs tus broă bơsong 2, 3 hìu bơnhă neh mus kơl brê, sơ gràm ù tam brê nàng lơh suơn, lơh hìu ơm tàm ƀòn lơgar, ồng Lê Quang Dần, Phó Kwang atbồ Sở Nông nghiệp mờ Phát triển Nông thôn càr Dăk Nông đơs: “Bè broă do, càr neh sồr pal bơsong kràñ cê. Bơh jơnau cih adat boh lam dê mờ bơta đơng lam bơh Ƀan Ƀí thư, Ƀan Lơh sa dà lơgar dê tàm dơ̆ lòt sền sơ wì bè broă lơh sa suơn sre tàm ù tam brê tàm càr. Bơdìh hơ̆ tai,càr kung neh tơlik kơrnuat nàng bơsong broă gam ờ niam tàm gah tam brê, tàm hơ̆ geh broă ù gơtìp sơ gràm. Bol hi sồr ală cau tờm brê, tàm hơ̆ geh Kông ty Đah jum Tây Nguyên kờp sền lơh ală rơndap broă lơh ngui bă ù do. Mờ kung geh broă rơndap lơh tơmut tàm rơndap broă sền gàr brê kơ̆ kơljap, di mờ jơnau cih bơh adat boh lam dê”.

Hìu bơnhă ồng Khưu, ơm tàm thôn 8, xã Bù Gia Mập, kơnhoàl Bù Gia Mập, càr Bình Phước mơya gam tam phan tàm tiah mờ tŭ do là bơnah brê bơh Kông ty Đah jum Tây Nguyên dê tàm càr Dăk Nông. Ồng Khưu là cau S’Tiêng, bau mờ cau M’Nông mờ ơm kis tàm do neh git nđờ jơt nam do. Ồng yal: “Bol hi neh ơm kis, lơh broă, tam phan tàm do bơh jŏ nam. Kòn añ dê deh tàm do, tŭ do bol khi neh geh bau kòn jơh. Bol hi kơp kờñ dà lơgar, càr Dăk Nông mờ càr Bình Phước dong kờl lơh gơlik bơta ƀuơn nàng bol hi gàr kơ̆ kơljap broă lơh sa. Tŭ do, dilah ntrờn lòt tiah ndai den ờ git lơh ñchi nàng kis”.

Hìu bơnhă ồng Điểu Bức, kòn cau M’nông kung lơh mìr jat mờng kwèng tam tàm pơdar chi tam tàm do bơh nam 1996, ală suơn mìr do kung bơh mè bèp tam phan lài do lời wơl. Nam 2012, gơnoar atbồ kơnhoàl Tuy Đức ai wơl tiah do, jàu kông ty Đah jum Tây Nguyên in atbồ. Điểu Bức pal ntrờn tus tiah ndai ơm kis. Tus nam 2016, ồng Điểu Bức bal mờ 2, 3 hìu bơnhă wơl rê wơl bă ù gơ wèt tiểu khu 1500, 1504 do, pơn jat tai lơh suơn mìr: “Bol hi geh 69 hìu bơnhă làng bol tàm do là kòn cau M’Nông, S’Tiêng, git là bol hi tàm do ờ di geh sră ơm kis sùm tàm càr Dăk Nông. Mơya kơp kờñ lơh bè lơi 2 càr bơsong dipal bol hi in nàng bol hi gàr kơ̆ kơljap rài kis. Ù tiah bol hi mìng geh tiah do lơm gời. Kơp kờñ bol hi geh kơ̆ kơlap lơh broă, lơh sa bè tam điều, tam tờm chi geh cồng nha lơh sa. Làng bol tŭ do ờ sơnơng tus broă mus kơl brê, sơ gràm ù brê nàng tam phan tai, mìng tam phan tàm bă ù neh jàu gời”.

            Làng bol mờ gơ̆p bơyô kờñ sền jơnau cih dơ̆ dùl dan pờ jăt gùng link do:

            https://cms-vov4.vov.vn/kho/jonau-tonggit-mpol-botian-thoi-su-xa-hoi/rot-jonau-cih-mat-gonap-gonoar-hodom-mbur-bre-jonau-cih-do-1-somom-broa-jau-mo-dop-bre-nang-joi-sa-kwo-do-dul-et-425042.vov4