VOV4.K’ho- Drim ngai 12/01, Ƀộ Quôk phòng bơyai lơh pơrjum pờ tơlik tàm internet tơn jơh lam lơh rơndap broă Sơlơ mblàng yal, bơto bơtê adat boh lam ai kwang bàng, làng bol tiah nhàr dà lơgar, bồt dà lềng in tơngai bơh nam 2017 tus nam 2021” tàm 46 anih pờ tơlik tơn bal mờ rlau 1 rbô 500 nă kwang ala mat tus bal tàm Gah đơng lam mpồl ling sền gàr tiah nhàr dà lơgar, ling dà lềng mờ ală càr tiah nhàr dà lơgar.

Ală kwang ala mat tus bal pơrjum ndrờm ring bal do là dùl rơndap broă lơh dờng, kờñ tơnguh jơnau git wă lơh jat adat boh lam ai làng bol tiah nhàr dà lơgar, bồt dà lềng in, lam lơh jat gùng dà bơh Đảng mờ dà lơgar dê bè bơt bơtàu tiah nhàr dà lơgar, bơt bơtàu rài sền gàr dà lơgar jơh gùt làng bol gơ jat bal mờ mpồl sền gàr lơngap lơngai làng bol kơ̆ kơljap, pràn kơldang.

Tàm 2 nam do, mờ nùs nhơm sơndră kòp bơtờp bè tam dră mờ bol sò tơm, mpồl ling sền gàr tiah nhàr dà lơgar neh lơh gơs jak ngan kơnòl dơ̆ lĕ bal, ờ mìng sền gàr kơ̆ kơljap gơnoar tờm ù tiah, lơngap lơngai tiah nhàr dà lơgar mờ gam rơcang sơndră kòp Kovid-19 mut bơ tờp gan tiah nhàr dà lơgar, sền gàr pràn kơldăng să jan, màng kis ai làng bol in, sền gàr bơta ring lơngai ai dà lơgar in.

Cau mblàng K’Duẩn