VOV4.K’ho- Mìu dờng jŏ jòng tàm uă jiơ tàm drim ngai 26/05 neh lơh bàr pe tiah gơwèt ù tiah 2 xã Mỹ Đức mờ Dà Pal kơnhoàl Dà Teh, càr Lâm Đồng dê gơtìp ngơr bam dà. Gĭt nđờ jơ̆t hìu làng bol mờ gĭt nđờ rơhiang lồ phan tam gơtìp aniai.

Mìu dờng lơh ngơr bam jơh tàm kơnhoàl Dà Teh, càr Lâm Đồng

Jat tơrgùm kờp bơh sơnrờp bơh anih lơh broă geh gơnoar dê, geh 22 nơm hìu ơm làng bol dê tàm ală thôn 5 mờ thôn 7 xã Mỹ Đức mờ thôn Xuân Châu, xã Dà Pal dê neh gơtìp dà lìu mut tàm hìu, ngơr jrô nggùl thơk. Mìu dờng, dà gơguh tih uă kung lơh 270 lồ phan tam, uă ngan là bă ù tam tờm zơu, tờm chi sa plai mờ bàr pe tơnau dà ròng ka bơh làng bol ơm tàm ală tiah thòng bơh 2 xã dê gơtìp ngơr bam jơh mờ aniai jơh. Ală gơl gùng lòt ală thôn, gùng ĐH95 lòt gan ù tiah xã Dà Pal dê gơtìp dà cò, tơrlah, ngan là ală gơl gùng gam tàm tơngai mut lơh.

Cau mblàng K’Hạnh