Drim òr (07/09), Thủ tướng Cíñ phủ ồng Phạm Minh Chính bal mờ Kwang đơng lam ală lơgar tàm mpồl ASEAN mờ Lơgar lơh broă bal pơn jăt tai tus bal Pơrjum Kấp dờng mpồl ASEAN mờ lơgar Ấn Độ dơ̆ 20 mờ Pơrjum Kấp dờng Đông Á (EAS) dơ̆ 18. Tàm Pơrjum Kấp dờng mpồl ASEAN mờ lơgar Ấn Độ dơ̆ 20, ală gah đơs uă bơta git gơ̆p Lơh broă bal jŏ jòng tơl ală bơta geh lơh tàm nam 2022. Thủ tướng lơgar Ấn Độ ồng Narendra Modi đơs tờm mpồl ASEAN là tiah tờm tàm broă lơh wèt tus hờ đah măt tơngai lik mờ là tiah tờm tàm Jơnau bơceh Ấn Độ Dương-Thái Bìñ Dương bơh lơgar Ấn Độ dê.

Mpồl ASEAN mờ lơgar Ấn Độ ring bal tơrgùm ai lài lơh broă bal dà lềng kơl jăp, lơh sa dà lềng tơlir, tam dră mờ sò tơm iơh bơsăk, cau tìs gan dà lơgar, tơnguh uă bơta pràn lơh sơnơm, lơh pràn broă tơrbŏ bal, ngui khoa họk kông nghệ, tam gơl sồ, mờ rề ơnàng lơh broă bal tam gơl năng lượng, sơndră mờ tam gơl trồ tiah. Thủ tướng lơgar Ấn Độ yal lơh Kes priă mpồl ASEAN mờ lơgar Ấn Độ tài tơnơ̆ do sồ. Tàm Pơrjum Kấp dờng mpồl ASEAN mờ Đông Á dơ̆ 18 (EAS-18), ală lơgar hơ geh kờñ bal gơnoar tờm bơh mpồl ASEAN dê, geh bơ̆t bơtàu bal tiah do pờ, ndrờm bal, tơrgùm bal mờ ai bơh tàm adăt boh lam dunia mờ sơnoa boh lam Liên hợp quốc dê.