Tàm dơ̆ tìp mat, broă rơndăp ù tiah phan tàm ù tiah tàm rơndăp rơndồl tus uă tiah làng bol ơm kis, neh gơ gơs tơngume geh uă cau tĕ khà geh jơnau đơs mờ jơnau dan. Jat Jơnau lơh nền sồ 866 bơh Thủ tướng Cíñ phủ dê, ƀòn dờng Bảo Lộc geh mờr 4 rơbô 300 lồ ù gơwèt nhàr rơndăp ù tiah jòi sền, tơnhào, lơh gơlik mờ ngui phan tàm ù tiah tơngai bơh nam 2021 - 2030 mờ rơndăp broă tus nam 2050. Uă ngan bă ù do gơwèt ală xã, sơnah ƀòn tờm, geh uă ngan làng bol ơm kis den ờ mìng lơh kal ke ai rài kis, lơh sa bơh làng bol dê lơm mờ broă lơh phan bơna bơt bơtàu drơng rài kis làng bol, gơ hòi gơ jà bơcri priă, bơtàu tơnguh lơh sa- mpồl bơtiàn tàm tiah do kung gơtìp gơ kòl sơl.

Tàm dơ̆ tìp mat, ồng Trần Đình Văn, Kwang atbồ Mpồl cau ala mat Quôk hội càr Lâm Đồng đơs là, rơndăp ù tiah phan kwơ ù tiah gam tàm rơndăp rơndồl mờ uă rơndăp ù tiah ndai bơh Dà lơgar bal mờ tiah do dê. Bơta do lơh gơlik uă bơta kòl yan bè adat boh lam, là bơta kơryan lơh gơ kòl tàm broă lam lơh jat bàr pe broă lơh tờm bơh càr dê. Broă do Mpồl cau ala mat Quôk hội kung neh geh jơnau đơs mờ Quôk hội mờ Cíñ phủ mờ Thủ tướng Cíñ phủ tàm dơ̆ pơrjum pa do nàng geh gùng dà broă lơh bơsong.