VOV4.K’ho- Drim ngai 06/04, Mpồl Cữ thập đỏ càr Dăk Lăk bơyai lơh dờp priă mờ phan bơna kờp mờ priă rlau 1 tơmàn 200 tơlak đong bơh ală mpồl dê dong kờl ai ală broă lơh sền gàr ờdo ờdă rài kis mpồl bơtiàn tàm càr in. Tàm dơ̆ dờp, ală cau dong kờl neh jàu priă jền lơh 4 nơm hìu bơta nđàc mờ kờp jơh priă lơh là 320 tơlak đong; pà 1 rbô ƀình lơh sàng dà mờ 500 bơnhă ồs dùl êt ñhŭ mờ kờp jơh priă 950 tơlak đong.

Ala măt ală cau dong kờl priă jền jàu ƀảng ai lơh pơnyơu dong kờl broă lơh in

Mò Trần Thị Phương Thu, Phó Củ tịc duh broă sùm Mpồl Cữ thập đỏ càr Dăk Lăk pà gĭt, Mpồl geh lòt sền, sac rwah ală hìu bơnhă geh rài kis kal ke ngan jăt broă jàu bơh mpồl dong kờl dê nàng dong kờl lơh hìu ơm. Gơwèt mờ ƀình lơh sàng dà mờ bơnhă ồs dùl êt ñhŭ, Mpồl Cữ thập đỏ càr neh tam pà ai ală tiah in nàng dong kờl ală hìu bơnhă rƀah ờ geh priă ngui bơnhă ồs gas, ală kơnhoàl tiah thòng bè Lăk, Ea Súp sùm gơtìp dà tih lơh aniai nàng dong kờl làng bol geh phan lơh sàng dà ngui tàm rài kis tàm nhai mìu dà tih. Do là broă lơh geh kwơ ngan bơh ală mpồl lơh sa kă bro dê nàng kờñ tàm sơm băt tê bal dong kờl ală rài kis kal ke, pơgồp bơnah tus bal bơ̆t bơtàu ƀòn lơgar pa, tiah drà jak chài tàm càr.

 Cau mblàng Lơ Mu K’Yến