Tàm dơ̆ lơh broă, kwang đơng lam UɃÑZ càr Hậu Giang dan mờ Mpồl kwang bàng lơh broă bơh Mpồl Đơng lam Dà lơgar bè rơcang sơndră mờ rềs àr bơh trồ tiah sền yal Thủ tướng Cíñ phủ dong kờl càr lơh ờ uă broă lơh, rơndăp broă lơh jal mhar nàng drơng tàm broă rơcang sơndră mờ rềs àr mờ ntrờn làng bol bơh tiah ngòt rơngơ̆t tài tơrlah ù tus tàm tiah lơngăp lơngai.

Đơs tàm dơ̆ lơh broă, ồng Hoàng Công Thủy sồr gah lơh broă geh gơnoar tàm càr Hậu Giang pơn jăt tai lơh niam broă yal mblàng nàng tơnguh uă jơnau git wă ai làng bol in bè bơta aniai rềs àr bơh trồ tiah lơh gơtìp, bơh tŭ hơ̆ geh broă rơcang lài nàng bal mờ gơnoar atbồ ƀòn lơgar tàm broă rơcang sơndră lài geh cồng nha.