VOV4.K’ho- Drim ngai 19/09, Mpồl lòt sền sồ 4 bơh Mpồl đơng lam dà lơgar bè rcang sơndră sa kuề sa kuà mờ ờ niam, bơh Đại tướng ồng Tô Lâm-Uỷ viên Ƀộ Cíñ trị, Ƀộ trưởng Ƀộ Kwang àng, Phó Kwang atbồ Mpồl đơng lam, lơh kwang atbồ Mpồl neh geh dơ̆ lơh broă mờ Ƀan Thường vụ Tỉñ ủy Gia Lai nàng yal cồng nha sền sơ wì broă lơh rcang sơndră sa kuề sa kuà mờ ờ niam tàm tiah do dê.

Đại tướng ồng Tô Lâm đơs tàm dơ̆ pơrjum

Pơndŭt dơ̆ lơh broă, Đại tướng ồng Tô Lâm sồr, Ƀan Thường vụ Tỉñ ủy Gia Lai pơn jat tai sơlơ tơnguh đơng lam, sồr lơh nàng kờñ tơnguh uă bơta gĭt wă, geh kơnòl bơh ală kấp ủy, gơnoar atbồ ală tiah tàm broă sền gŏ, dờp mờ bơsong jơnau yă, jơnau yal, jơnau đơs yal yă ală dơ̆ broă geh tềl tơngŏ lơh tìs bè sa kuề sa kuà lơh sa mờ ờ niam. Đại tướng ồng Tô Lâm sồr càr Gia Lai pal sền gròi uă ngan, sền ngăc rlau tai tàm broă đơng lam sồr lơh ală anih lơh broă geh gơnoar nàng sền gĭt gờñ ală jơnau yal bè cau lơh tìs tàm gah broă atbồ ù tiah, phan kwơ tàm ù, sền gàr brê, lơh glài kràñ ală cau dùl nă să is, mpồl cau lơh tìs, mơkung geh gơdờp lơh tơmàl, kah rơngal, rcang sơndră lài mờ kơryan cau lơh tìs tàm ù tiah càr dê.

Cau mblàng K’Hạnh