VOV4.K’ho - Drim òr (31/05), Mpồl kwang bàng lùp sền sồ 4 bơh Mpồl đơng lam Dà lơgar bè broă rơcang sơndră mờ sa kuề sa koà, ờ niam, neh lơh broă mờ Tỉñ ủy Dăk Lăk, yal kơrnoăt lùp sền broă đơng lam, lam sồr mờ bơyai lơh jăt broă gŏ, dờp, bơsong jơnau yal yă, yal bè cau tìs, sồr yă ală broă geh tơngŏ tìs bè sa kuề sa koà, lơh sa ờ niam.

Mpồl đơng lam dà lơgar bè rơcang sơndră mờ sa kuề sa koà, ờ niam yal kơrnoăt lùp sền tàm Ƀan Thường vụ Tỉñ ủy Dăk Lăk

Jăt rơndăp broă, Mpồl kwang bàng do geh lơh broă tơn mờ Ƀan Thường vụ Tỉñ ủy mờ sền tàm 4 anih lơh broă là Thàñ ủy Buôn Ma Thuột, Viện Kiểm sát làng bol càr, Kwang àng càr, Thañ tra càr bè ală tơngu me: broă đơng lam, lam sồr bơh kấp ủy, mpồl lơh broă đảng gơwèt mờ broă tam jào, dờp, bơsong jơnau yal bè cau tìs, tơrgùm tàm ală gah broă ƀuơn gơtìp sa kuề sa koà; ờ niam; broă gŏ, jun jơnau tơngit bè cau tìs tus mờ ală anih lơh broă geh gơnoar, tàm hơ̆ uă ngan là gơwèt mờ ală gah broă ƀuơn gơtìp sa kuề sa koà, ờ niam; broă dờp, bơsong bơh ală anih lơh broă geh gơnoar gơwèt mờ jơnau tơngit cau tìs; broă pơgồp bal đah ală anih lơh broă geh gơnoar gŏ, tam jào, dờp, bơsong jơnau tơngit bè cau tìs; broă bơsong jơnau yal yă, yă, bơsong ală broă lơh adăt boh lam tàm broă gŏ, tam jào, dờp, bơsong jơnau tơngit bè cau tìs...

Tơngai sền bơh ngai 01 nhai 01 nam 2011 tus ngai 31 nhai 12 nam 2021 mờ ală jơnau yă, jơnau yal bè cau tìs, jơnau sồr yă, ală jơnau sồr sền nàng git, jơnau sồr jăt sền nền, jơnau sồr lơh nền khà priă lài mờ ngai 01 nhai 11 nam 2011 mơya ờ hềt geh bơsong.

Cau mblàng Ndong Brawl