VOV4.K’ho- Drim ngai 20/09, Mpồl lơh broă bơh Mpồl đơng lam Dà lơgar bè rơcăng sơndră sa kwề sa kwà, bơta ờ niam bơh Đại tướng ồng Tô Lâm, Ủy viên Ƀộ Cíñ trị, Ƀộ trưởng Ƀộ Kwang àng, Phó Kwang ătbồ Mpồl đơng lam Dà lơgar bè rơcăng sơndră sa kwề sa kwà, bơta ờ niam lơh kwang ătbồ mpồl neh geh dơ̆ lơh broă mờ Tỉñ ủy Dăk Lăk bè tơngume yal jơnau rơcăng cih jơnau yal cồng nha sền swì bơh mpồl sền swì sồ 4 dê tàm Ƀan Thường vụ Tỉñ ủy Dăk Lăk.

Ồng Nguyễn Xuân Trường, Kwang ătbồ Vụ Ƀòn lơgar Ƀan Nội cíñ Dà lơgar ala măt Mpồl lơh broă yal jơnau rơcăng cih cồng nha sền swì

Jăt jơnau rơcăng cih jơnau yal ală cồng nha sền swì bơh mpồl sền swì dê, pah nam, Ƀan Thường vụ Tỉñ ủy Dăk Lăk ai lơh jăt mờ lơh jăt broă rơndăp lơh sền swì broă yal yă lùp khàu, tơlik măt mờ cah rña ală dơ̆ broă, dơ̆ lơh tìs sa kwề sa kwà, lơh sa, dơ̆ broă, dơ̆ lơh tìs kal ke, pơneh mpồl bơtiàn sền gròi mờ kờp sền ală dơ̆ lùp sền bè lơh sa- mpồl bơtiàn tàm bàr pe tiah, anih lơh broă mờ pơgồp bal tơngume do tàm ală tŭ lam lơh jăt ală gùng dà broă lơh dờng bơh Đảng dê mờ adat boh lam bơh Dà lơgar dê gơwèt mờ broă lơh rơcăng sơndră sa kwề sa kwà, bơta ờ niam.

Đại tướng ồng Tô Lâm, Ủy viên Ƀộ Cíñ trị, Ƀộ trưởng Ƀộ Kwang àng, Phó Kwang ătbồ Mpồl đơng lam Dà lơgar bè rơcăng sơndră sa kwề sa kwà, bơta ờ niam đơs jơnau pơndŭt dơ̆ lơh broă

Đơs pơndŭt dơ̆ lơh broă, Đại tướng ồng Tô Lâm, Ủy viên Ƀộ Cíñ trị, Ƀộ trưởng Ƀộ Kwang àng, Phó Kwang ătbồ Mpồl đơng lam Dà lơgar bè rơcăng sơndră sa kwề sa kwà, bơta ờ niam, sồr: Ƀan Thường vụ Tỉñ ủy Dăk Lăk pơn jăt tai sồr ală kâp ủy, gơnoar ătbồ, ală đảng ƀộ, ci ƀộ gơwèt bal kơlôi sơnơng, gĭt loh mờ lơh jăt niam ală nùs nhơm, gùng dà broă lơh mờ jơnau sồr bơh Đảng dê mờ adat boh lam bơh Dà lơgar dê, kung bè bơh Tỉñ ủy mờ Ƀan Thường vụ Tỉñ ủy, Ủy ƀan Ñân zân càr bè broă lơh rơcăng sơndră sa kwề sa kwà, bơta ờ niam. Tơnguh tai broă sền swì, jăt sền kung bè sền swì is, jăt sền bơh Ƀan Thường vụ Tỉñ ủy, ală kâp ủy, mpồl đảng dê gơwèt mờ broă lơh rơcăng sơndră sa kwề sa kwà, bơta ờ niam đơs bal, broă lơh dờp kơno, bơsong jơnau yă, jơnau yal bè cau lơh tìs mờ sồr lùp khàu yal yă đơs is.

Tơnguh uă cồng nha sền swì, jăt sền, sền swì is, jăt sền, sồr bơsong kràñ ală jơnau ờ niam, ờ pràn jak. Mờ Ƀan Thường vụ Tỉñ ủy Dăk Lăk kung rơcăng lài geh broă rơndăp lơh bơsong ală bơta gam gơkòl, ờ hềt lơh jak mờ lơh jăt wil tơl ală jơnau sồr neh cih tàm Jơnau yal cồng nha sền swì bơh Mpồl sền swì sồ 4 dê, yal mờ Mpồl đơng lam Dà lơgar bè rơcăng sơndră sa kwề sa kwà, bơta ờ niam in jăt di jơnau sồr. Mìng is gơwèt mờ ù tiah càr Dăk Lăk, Ƀan Thường vụ Tỉñ ủy pal sền gròi uă ngan rlau tai tàm broă đơng lam, sồr ală anih lơh broă geh gơnoar gŏ gờñ ală jơnau yal bè cau lơh tìs tàm gah broă lơh ătbồ ù tiah, phan kwơ geh is mờ sền gàr brê.

Cau mblàng Lơ Mu K’Yến