Drim òr (16/05), tàm hìu lơh broă Đảng Dà lơgar, tềng đăp broă đơng lam bơh Tổng Ƀí thư ồng Nguyễn Phú Trọng, Mpồl đơng lam Đảng Dà lơgar khoă XIII sơn đờm Pơrjum dơ̆ 09. Tàm pơrjum do, Mpồl đơng lam Đảng Dà lơgar geh cri bơyai bè ală tơngu me: Rơndăp broă kơlôi sơnơng ală sră nggal yal Pơrjum dờng dơ̆ XIV Đảng dê; rơcang ai broă đơng lam bơyai lơh pơrjum dờng đảng ƀộ ală kấp wèt tus Pơrjum dờng dơ̆ XIV Đảng dê bal mờ ờ uă bơta kwơ màng ndai.

Đơs tàm dơ̆ sơn đờm Pơrjum, Tổng Ƀí thư ồng Nguyễn Phú Trọng đơs loh: Jăt broă rơndăp lơh geh ai, Pơrjum dờng kwang bàng ala măt gùt lơgar dơ̆ XIV bơh Đảng dê geh bơyai lơh tàm bồ nam 2026, tơnơ̆ mờ tŭ jơh dùl tơngai lơh broă 5 nam gùt Đảng, gùt làng bol, gùt ling klàng he dê lơh ngan lơh jăt Nghị quyết Pơrjum dờng Đảng dơ̆ XIII. Tơngu me broă lơh tàm Pơrjum Đảng dà lơgar dơ̆ do geh kwơ màng ngan, Tổng Ƀí thư ồng Nguyễn Phú Trọng sồr, Dà lơgar mờ ală kwang bàng tus pơrjum ngui bơta ngăc ngar, nùs nhơm geh kơnòl, tơrgùm kơlôi sơnơng, cri bơyai nền nòn, pơgồp jơnau đơs nàng lơh gơs ală jơnau yal, rơndăp broă geh ai mờ sền wơl, ai tơngŏ nền nòn tàm lồi pơrjum.