VOV4.K’ho- Mho ngai 12/01, Mpồl kwang bàng bơh Kiểm toán dà lơgar dê bơh ồng Trần Sỹ Thanh, Ủy viên Ƀan Cấp hàñ Đảng dà lơgar, Tổng Kiểm toán dà lơgar lơh kwang atbồ mpồl neh geh dơ̆ lơh broă mờ kwang đơng lam bồ càr Dăk Lăk bè broă lam lơh jat ală jơnau đơs pơn dut kiểm toán bơh càr dê. Yal mờ mpồl kwang bàng, Ƀí thư Tỉnh ủy Dăk Lăk ồng Nguyễn Đình Trung neh yal dùl êt bè 2, 3 cồng nha lơh geh bơh càr dê tàm tơngai lài, tàm hơ̆, ală kấp, ală gah broă lơh neh lam lơh jat nền nòn jơnau đơng lam bơh Đảng dà lơgar, Cíñ phủ, Thủ tướng Cíñ phủ dê, lam lơh jat jơnau kờñ dơ̆ lĕ bal, ờ mìng tơrgùm chồl pràn lơh sa kă bro, gàr niam ờdo ờdă rài kis mờ gam lam lơh jơh nùs, geh cồng nha broă lơh rơcang sơndră kòp Kovid-19.

Đơs tàm dơ̆ lơh broă, ồng Trần Sỹ Thanh cih dờp mờ đơs niam ală cồng nha mờ càr Dăk Lăk neh lơh geh tàm nam lài, ngan là tàm ală gah gơ hòi gơ jà bơcri priă mờ dong kờl mpồl lơh sa kă bro. Kuơmàng, Dăk Lăk pal tơrgùm bơsong mhar, bơsong jơh ală broă gam wơl tàm Jơnau yal kiểm toán kes priă càr dê bơh nam 2016 rê hờ lài mờ Kiểm toán dà lơgar neh pơn dut.

Cau mblàng K’Duẩn