VOV4.K’ho- Mho ngai 02/3, mpồl kwang bàng gròi sền bơh Quôk hội dê lơh broă mờ Ƀộ Xây zựng bè lam lơh Adat Rơndap ù tiah. Tàm dơ̆ lơh broă, mpồl kwang bàng gròi sền bơh Quôk hội dê đơs gam geh bơta lơyài tàm broă bơt bơtàu 2 rơndap ù tiah gah broă lơh dà lơgar, hơ̆ là rơndap ù tiah tiah drà mờ ƀòn lơgar mờ rơndap ù tiah gròi sền tơnhàu lơh gơlik, ngui phan kuơ tàm ù mờ phan bơna bơt bơtàu.

Mblàng lơh loh jơnau bơh tài lơyài, Ƀộ trưởng Ƀộ Xây zựng ồng Nguyễn Thanh Nghị pà git, jơnau cih adat boh lam pa sồr bè broă bơt bơtàu, broă lơh rơndap ù tiah jat gùng dà tơrgùm jơh ală bơta pal geh bơta pơgồp bal dơ̆ lĕ, ring bal bơh ală gah broă lơh, ală kấp dê. Phó Củ tịc Quôk hội ồng Nguyễn Đức Hải sồr Ƀộ Xây zựng pơn jat tai kờp sền, geh jơnau yal mblàng lơh loh ngan ngồn bè ală broă geh kwang bàng tàm mpồl gròi sền ai tơlik, tàm hơ̆, tơrgùm lơh sir 2 rơndap ù tiah gah broă lơh dà lơgar nàng yal Thủ tướng in ring bal tàm nhai 12 nam do.

Cau mblàng K’Duẩn